ماڭعىستاۋدىڭ مەديتسينا باسقارماسىنىڭ ماتەريالدىق-تەحنيكالىق بازاسى 2 جىلجىمالى مەديتسينالىق كەشەنمەن تولىقتى, دەپ حابارلايدى Egemen.kz.
ءوڭىر باسشىسى سەرىكباي ترۇموۆ وتاندىق اۆتوكولىك نەگىزىندە قۇرىستىرىلعان جانە كوشپەلى جاعدايدا ازاماتتاردىڭ دەنساۋلىعىن تەكسەرۋدىڭ كەڭ سپەكترىنە ارنالعان تەحنيكالاردى تۇپقاراعان مەن قاراقيا اۋداندىق اۋرۋحانالارىنا تابىستادى. جىلجىمالى مەديتسينالىق كەشەندەر تسيفرلىق قۇرالدارمەن جابدىقتالعان.
رەنتگەن, ۋلترادىبىستىق زەرتتەۋ سەكىلدى زاماناۋي قۇرال-جابدىقتارمەن قامتاماسىز ەتىلگەن. بۇل كەشەندە مەديتسينالىق, ديسپانسەرلىك تەكسەرۋلەر, كونسۋلتاتسيالىق-دياگنوستيكالىق مەديتسينالىق كومەك كورسەتۋ, مەديتسينالىق جانە زەرتحانالىق زەرتتەۋلەر, سالاۋاتتى ءومىر سالتىن ۇگىتتەۋ جانە قالىپتاستىرۋ قىزمەتى جۇرگىزىلمەك.
ارنايى جاساقتالعان كولىك وبلىس ورتالىعىنان شالعاي ورنالاسقان حالىققا مەديتسينالىق قىزمەتتەردى جوعارى دەڭگەيدە كورسەتۋگە مۇمكىندىك بەرەدى.