سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىندە ۆلاديمير ۆولكوۆتىڭ توراعالىق ەتۋىمەن ۋچاسكەلىك ينسپەكتورلاردىڭ مارتەبەسىن كوتەرۋ جانە ماتەريالدىق-تەحنيكالىق قامتاماسىز ەتۋدى جاقسارتۋ ماسەلەلەرى تالقىلانعان وتىرىس بولدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنىڭ جولداۋىندا ۋچاسكەلىك ينسپەكتورعا باستى ءرول بەرۋ جانە جەرگىلىكتى پوليتسيا قىزمەتىنە جالپى رەفورما جاساۋدىڭ ۋاقىتى جەتكەنى ايتىلعان بولاتىن. پرەزيدەنت ۋچاسكەلىك ينسپەكتور مارتەبەسىن زاڭدى تۇردە ارتتىرۋدى, وعان ناتيجەلى جۇمىس ىستەۋ ءۇشىن بارلىق مۇمكىندىكتەردى بەرۋدى تاپسىردى.
وتىرىسقا كوميتەت مۇشەلەرى, سونداي-اق باس پروكۋراتۋرانىڭ, قارجى جانە ىشكى ىستەر مينيسترلىكتەرىنىڭ وكىلدەرى, ونىڭ ىشىندە وبلىستىق پوليتسيا دەپارتامەنتتەرىنىڭ جەرگىلىكتى پوليتسيا قىزمەتىنىڭ باسشىلارى قاتىستى.
سەناتورلار مەملەكەت باسشىسىنىڭ جولداۋىندا جانە ءىىم-ءنىڭ كەڭەيتىلگەن القا وتىرىسىندا ايتىلعان باستامالارىنا ەرەكشە نازار اۋداردى. اندرەي لۋكين قۇقىق قورعاۋ ورگاندارىنىڭ قىزمەتكەرلەرىن ادامدارمەن اشىق ديالوگ جۇرگىزۋگە ۇيرەتۋ ماڭىزدى ەكەنىن اتاپ ءوتتى. بۇل باعىت كادرلاردى دايارلاۋ جانە ىرىكتەۋ جۇيەسىندە باسىم باعىت بولۋعا ءتيىس. ونىڭ ايتۋىنشا, بۇگىنگى تاڭدا ۋچاسكەلىك پوليتسيا ينسپەكتورلارىنىڭ تىكەلەي فۋنكتسيالارىن ورىنداۋعا كەدەرگى كەلتىرەتىن ماڭىزدى پروبلەمالار بار.
"تۇراقتى ساقتالاتىن بوس ورىندار, نورماتيۆتەن تىس جۇمىستاردى ورىنداۋ ەسەبىنەن ۋچاسكەلىك ينسپەكتورلاردىڭ جۇكتەمەسى ۇلعايىپ كەلەدى. سونىمەن قاتار كەيبىر ايماقتارداعى جەرگىلىكتى پوليتسيا قىزمەتى بولىمشەلەرىنىڭ قىزمەتى كوبىنەسە اباتتاندىرۋ ەرەجەلەرىن ساقتاۋعا, رۇقسات ەتىلمەگەن ساۋداعا جول بەرمەۋگە, سانيتارلىق جاعدايدى قامتاماسىز ەتۋگە جانە بيۋدجەتتى تولىقتىرۋعا باعىتتالعان. بۇدان باسقا, جەرگىلىكتى پوليتسيا قىزمەتىنىڭ جۇمىسىن ۇيىمداستىرۋدا, باسقا مەملەكەتتىك ورگاندارمەن ءوزارا ءىس-قيمىلدا جانە ەڭبەك جاعدايلارىنىڭ بولماۋىندا دا پروبلەمالار بار. ۋچاسكەلىك پوليتسيا ينسپەكتورلارىنىڭ فۋنكتسيونالدىق مىندەتتەرىن ساپالى ورىنداۋىنا ۇيىمداستىرۋشىلىق پروبلەمالاردىڭ كوپ بولۋى مۇمكىندىك بەرمەيدى", - دەدى اندرەي لۋكين.
سەناتورلار ايتىلعان بارلىق پىكىرلەر ۋچاسكەلىك ينسپەكتوردىڭ مارتەبەسىن كوتەرۋ تۋرالى زاڭ جوباسىن ازىرلەۋ كەزىندە ەسكەرىلىپ, وعان ءتيىمدى جۇمىس ىستەۋ ءۇشىن قاجەتتى وكىلەتتىكتەر بەرىلەتىنىن اتاپ ءوتتى.
سونداي-اق دەپۋتاتتار ۋچاسكەلىك پوليتسيا ينسپەكتورلارىنىڭ جالاقىسىن ۇلعايتۋ جانە ولاردىڭ تۇرعىن ءۇي پروبلەمالارىن شەشۋ ماسەلەسىن قاراۋدى, سونداي-اق ۋچاسكەلىك پوليتسيا پۋنكتتەرىن ماتەريالدىق-تەحنيكالىق جابدىقتاۋدى نىعايتۋ ءۇشىن قوسىمشا قارجى ءبولۋدى ۇسىندى.