حالىقارالىق دزيۋدو فەدەراتسياسى (IJF) بۋداپەشتتە (ۆەنگريا) اياقتالعان "ۇلكەن دۋلىعا" تۋرنير قورىتىندىسى بويىنشا قالىپتاستىرىلعان الەم دزيۋدوشىلارىنىڭ جاڭا رەيتينگىن جاڭارتتى. جارىسقا الەمنىڭ 69 ەلىنەن 459 سپورتشى باق سىناسقان, دەپ حابارلايدى Egemen.kz.
سايىستىڭ قورىتىندىسى بويىنشا ارميا ورتالىق سپورت كلۋبىنىڭ سپورتشىسى ەفرەيتور عۇسمان قىرعىزباەۆ 60 كەلىگە دەيىنگى سالماق دارەجەسىندە الەمدىك رەيتينگتەگى ۇزدىك دزيۋدوشىلاردىڭ جەتىنشى قاتارىنا ەندى. ونىڭ ەسەبىندە 4080 ۇپاي بار.
"بۋداپەشتتەگى "ۇلكەن دۋلىعا" سايىسى, كوروناۆيرۋستىق پاندەميامەن بايلانىستى ۇزاق ۇزىلىستەن كەيىنگى العاشقى ماڭىزدى تۋرنير بولدى. جارىسقا قاتىسۋشىلار قۇرامى وتە بىلەكتى, الەمنىڭ ۇزدىك بالۋاندارى قاتىستى. وسىعان قاراماستان, عۇسمان جوعارى ناتيجە كورسەتتى. ەندى ءبىزدى الداعى جارىستارعا ۇزدىكسىز جاتتىعۋلار كۇتىپ تۇر", – دەپ ءوز ويىمەن ءبولىستى ارميا ورتالىق سپورت كلۋبىنىڭ وليمپيادالىق سپورت تۇرلەرى بويىنشا شتاتتىق كوماندالاردى دايارلاۋ ءبولىمىنىڭ باستىعى مايور انۆار ۇسەنوۆ.
عۇسمان قىرعىزباەۆ – قر ۇلتتىق قۇراماسىنىڭ مۇشەسى, 2016 جىلى تسيۋريحتە (شۆەيتساريا) وتكەن CISM (حالىقارالىق اسكەري سپورت كەڭەسى) اسكەري قىزمەتشىلەرى اراسىنداعى الەم چەمپيوناتىنىڭ جەڭىمپازى, 2018 جىلى اگاديردە (ماروككو) وتكەن گران-پري كەزەڭىنىڭ جانە دە 2019 جىلى ابۋ-دابيدە ء(باا) وتكەن "ۇلكەن دۋلىعا" (Grand-Slam) ءتۋرنيرىنىڭ چەمپيونى, وكىلدى حالىقارالىق تۋرنيرلەردىڭ بىرنەشە دۇركىن جۇلدەگەرى.