اقمولا وبلىسى استراحان اۋدانىندا قۇتقارۋشىلار بەس كۇن بويى بالىقشىلاردى ىزدەپ ءجۇر. ءۇش دوس بىرگە كولدىڭ جاعاسىندا بالىق اۋلاپ, جوعالىپ كەتتى, ىزدەۋ ورىندارىندا جاعادان ءبىر شاقىرىم قاشىقتىقتا قامىس ۇستىندە توڭكەرىلگەن مەتالل قايىق تابىلدى. وقيعا ۇزىنكول اۋىلدىق وكرۋگىنىڭ اۋماعىندا, بارشىن كولىنىڭ ماڭىندا بولعان, دەپ حابارلايدى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
"ىزدەۋ جۇمىستارى بارىسىندا 1981 جانە 1976 جىلى تۋعان ەكى ەر ادامنىڭ دەنەسى تابىلدى, 1978 جىلى تۋعان ءۇشىنشى ەر ادامدى ىزدەۋ جالعاسۋدا", - دەپ حابارلادى قر تجم رەسمي وكىلى تالعات ءۋالي.
مۇز استىنان بالىق اۋلاۋشىلارعا بالىق اۋلاۋدى جەكە قۇتقارۋ قۇرالدارى بولعان كەزدە عانا جۇزەگە اسىرۋ ۇسىنىلادى. ەگەر ءسىز قايىقتا بالىق اۋلاساڭىز نەمەسە اڭ اۋلاساڭىز, وندا ول تەحنيكالىق جاعىنان جاقسى, سۋ توگەتىن جانە قۇتقارۋ قۇرالدارىمەن جابدىقتالعان بولۋى كەرەك. قايىقتا بولعان كەزدە مىندەتتى تۇردە قۇتقارۋ كەۋدەشەسىن كيۋ جانە ەشقانداي وقىس قيمىل جاساماۋ, قايىقتىڭ شەتىنە ەڭكەيىپ تۇرماۋ, جۇرمەۋ قاجەت.
"سونىمەن بىرگە قر تجم كۇزگى-قىسقى كەزەڭدە سۋ ايدىندارى جۇقا مۇزبەن جابىلاتىنىن جانە وعان مۇز استى بالىق اۋلاۋدى جاقسى كورەتىن بالىقشىلار شىعىپ, ءوز ومىرىنە قاۋىپ توندىرەتىنىن ەسكە سالادى. سونىمەن قاتار ازاماتتاردى سۋ ايدىندارىنداعى قاۋىپسىزدىك قاعيدالارىن ساقتاۋعا: قاراڭعى ۋاقىتتا جانە كورىنۋى ناشار بولعان كەزدە مۇزعا شىقپاۋعا; جۇقا جانە قاتپاعان مۇز ۋچاسكەلەرىنە شىقپاۋعا; مۇزدىڭ جەكە ۋچاسكەلەرىندە توپتاسىپ جينالماۋعا; مۇزداعى شۇڭقىرلارعا, جارىقتارعا, ويىقتارعا جاقىنداماۋعا شاقىرامىز", دەلىنگەن حابارلامادا.