الماتى – ارماندار توعىسقان اردا قالا. مۇندا ءومىر سۇرگەن ادام تىرشىلىك ىرعاقتارىن بۇكىل جان دۇنيەسىمەن سەزىنەدى. ميلليون تاعدىر مۇڭىن شاعىپ, سىرىن اشقان ساۋلەلى شاھار تۇپتەپ كەلگەندە ءوز تۇرعىندارىن ماقسات شىڭىنا قاراي جەتەلەيدى. ويتكەنى اركىمنىڭ جۇرەگىندە ءوز الماتىسى بار. «وتكىنشى جاڭبىر» دەپ اتالعان سۋ جاڭا وتاندىق تەلەحيكايا الماتى تابىستىرعان تاعدىرلاردىڭ ءومىر يىرىمدەرىن وزىنشە سۋرەتتەگەن.
تەلەونىم تاعدىر تالكەگىمەن الماتىدا كەزدەسىپ, جاقىن دوس بولىپ, ورتاق ءىس اشاتىن ەكى ايەلدىڭ تاعدىرى مەن ولاردىڭ ارماندارى تۋرالى باياندايدى. سول ۋاقىت ارالىعىندا ولار وزگەرەدى, جەكە تۇلعا رەتىندە وسەدى, قيىندىقتاردى جەڭىپ, تابىسقا جەتەدى. ءبىر سوزبەن ايتقاندا, بۇل ومىردە ءبارى مۇمكىن ەكەنىن دالەلدەيدى.
تاياۋ كۇندەرى «الماتى» تەلەارناسى ارقىلى كوپشىلىككە جول تارتاتىن تەلەحيكايانىڭ ءار بولىمىندە كورەرمەن ءوزىن جانە وتباسىنا جاقىن وقيعانى كورۋى مۇمكىن. تۋىندىنىڭ باستى كەيىپكەرى – جانار ەسىمدى كوپبالالى انا. كۇندەلىكتى ءۇي شارۋاسىنان زەرىككەن ول – كاسىپكەرلىكتى قولعا الىپ, ەل قاتارلى جۇمىس ىستەگىسى كەلەدى. الايدا جۇبايى بۇل ويىن قۇپتامايدى.
ەكىنشى كەيىپكەر – اجار. ول جالعىزباستى انا ءارى كاسىپكەر. تاپسىرىسپەن بالكۇلشە (تورت) ءپىسىرۋ, ونىڭ باستى تابىس كوزى. جۇمىستان جالىققان ول – كەرىسىنشە وتباسىلىق ءومىردى اڭسايدى. كەيىپكەرلەردىڭ تاعدىرى ءارتۇرلى بولعانىمەن, باسقا تۇسكەن قيىندىق ەكەۋىنىڭ باسىن ءبىر ارناعا توعىستىرادى.
– بۇل ۋاقىت تىنىسىن تانىتاتىن جوبا. «وتان وتباسىنان باستالادى» دەيتىن قاعيدانىڭ قاي كەزدە دە ءباسى بيىك. ءومىر بولعان سوڭ ەرلى زايىپتىلار اراسىندا ءتۇرلى تۇيتكىلدەر بولادى. وتباسى بەرىكتىگىن ساقتاۋ, شاڭىراقتى شايقالتپاۋ ۇلكەن جاۋاپكەرشىلىك. بالالارعا تاعىلىمدى تاربيە بەرۋ, ادام ەتۋ ءبارىمىزدىڭ اتا-انالىق مۇراتىمىز. كەيدە ءبىز جۇمىس دەپ ءجۇرىپ, وتباسىنا كوڭىل بولە الماي نەمەسە جۇمىستاردى ىسىرىپ قويىپ, تەك وتباسىنىڭ قاسىندا بولىپ جاتامىز. قاراپ وتىرساق, بۇل تۇستا تەپە-تەڭدىكتى ۇستاپ تۇرۋ وتە قيىن. وسى جانە وتباسىندا بولاتىن وزگە دە ماسەلەلەر تەلەحيكايادا جاقسى ءورىس العان. «وتكىنشى جاڭبىر» تەلەحيكاياسى – ءومىردىڭ وتكىنشى ەكەنىن, باقىتتى دەر كەزىندە باعالاي ءبىلۋدىڭ قادىرىن ۇيرەتەدى, – دەيدى تەلەحيكايانىڭ باستى رولدەرىنىڭ ءبىرىن سومداعان بەلگىلى اكتەر المات ساقاتوۆ.
تۋىندىدا كەيىپكەرلەردىڭ قىزىقتى ومىرىمەن قوسا, الماتى قالاسىندا جۇيەلى جۇزەگە اسىپ جاتقان «باقىتتى وتباسى», «ەڭبەك», «ىسكەر انا», «بيزنەس باستاۋ» سەكىلدى الەۋمەتتىك جوبالار كورىنىس تاۋىپ, جاستارعا باعىت-باعدار بەرەدى. ارۋ قالانىڭ اسەم كەلبەتىن ايشىقتاعان جوبادا تالاپ پەن تالماي ىزدەنۋ, بولاشاققا سەنۋ, ماقساتكەرلىك سەكىلدى ايرىقشا قاسيەتتەر كورەرمەنگە ءۇمىت سىيلايدى. سالتانات باقاەۆا, نۇرگۇل مىڭعاتوۆا سەكىلدى اكتريسالار قازىرگى قازاق ايەلىنىڭ ارمانى, وتباسى قۇندىلىعى, سىيلاستىق, دوستىق, تۋىستىق قارىم-قاتىناستىڭ قاسيەت-قالىبىن دارىپتەگەن جوبانىڭ شىرايىن اشا تۇسكەن.
ۇلتتىق ەكرانىمىزدىڭ ءتول تۋىندىلارمەن تولىعا تۇسكەنى كوڭىل قۋانتادى. مارتەبەلى كورەرمەنگە جۋىق ارادا جول تارتاتىن جاڭا جوبا كوپشىلىكتىڭ تالعام بيىگىنەن كورىنەر دەگەن سەنىمدەمىز.
الماتى