ليتسەنزياسىنان ايىرىلعان جوعارى وقۋ ورىندارىنىڭ ستۋدەنتتەرى سەمەستردىڭ اياقتالۋىن كۇتپەي-اق باسقا ۋنيۆەرسيتەتتەرگە اۋىسا الادى. بۇل تۋرالى بعم ءباسپاسوز قىزمەتى حابارلادى.
جوعارى وقۋ ورىندارىنىڭ جابىلۋى مەن ستۋدەنتتەردى باسقا وقۋ ورىندارىنا ۋاقىتىلى اۋىستىرۋ قاجەتتىلىگىنە بايلانىستى مينيسترلىك نورماتيۆتىك قۇجاتتارعا وزگەرىستەر ەنگىزدى. ەندى جوو ءبىلىم بەرۋ قىزمەتىمەن اينالىسۋ ليتسەنزياسىنان نەمەسە ليتسەنزياعا قوسىمشادان ايىرىلعاندا (قايتارىپ الىنعان) نەمەسە جوعارى وقۋ ورنى جابىلعان جاعدايدا اتالعان وقۋ ورنىنىڭ ستۋدەنتتەرى سەمەستردىڭ اياقتالۋىن كۇتپەي-اق بىردەن باسقا جوعارى وقۋ ورىندارىنا اۋىسا الادى.بۇل نورما وقۋلارىن جالعاستىرۋ بارىسىندا ستۋدەنتتەرگە قولداۋ كورسەتۋگە باعىتتالعان.قازىر بعم ءبىلىم بەرۋ ۇيىمدارى قىزمەتىنىڭ ۇلگىلىك قاعيدالارىنا ليتسەنزياسى توقتاتىلعان جوو ءبىلىم الۋشىلارىن اۋىستىرۋ بولىگىندە قوسىمشا وزگەرىستەر ەنگىزۋ بويىنشا جوعارى وقۋ ورىندارىنان ءتۇسىپ جاتقان بىرقاتار ۇسىنىس قاراستىرىپ جاتىر. الداعى ۋاقىتتا مۇنداي جاعدايلار ورىن السا, ستۋدەنتتەر ليتسەنزيانىڭ ىقتيمال كەرى قايتارىلۋىن كۇتپەي-اق باسقا جوو-عا اۋىسا الادى.