ەرالى توعجانوۆ جۇمىس ساپارىمەن اتىراۋ وبلىسىنا باردى

مەملەكەت باسشىسىنىڭ تاپسىرماسىنا سايكەس وڭىرلەردىڭ ەپيدەميولوگيالىق جاعدايى جانە كوروناۆيرۋستىق ينفەكتسيانىڭ ەكىنشى تولقىنىنا دايىندىعىمەن تانىسۋ ماقساتىندا قر پرەمەر-ءمينيسترىنىڭ ورىنباسارى ەرالى توعجانوۆ جۇمىس ساپارىمەن اتىراۋ وبلىسىندا بولدى. جەدەل كەڭەستە اتىراۋ وبلىسىنىڭ اكىمى ءوڭىردىڭ COVID-19 ەكىنشى تولقىنىنا دايىندىعى تۋرالى باياندادى. كەڭەس قورىتىندىسى بويىنشا ە.توعجانوۆ ءوڭىر باسشىلىعىنا ەپيدەميولوگيالىق احۋالدى, حالىقتى جانە مەديتسينالىق مەكەمەلەردى ءدارى-دارمەكپەن, سونداي-اق ءوجج اپپاراتتارى جانە وتتەگى كونتسەنتراتورلارىمەن قامتاماسىز ەتىلۋ ماسەلەلەرىن ەرەكشە باقىلاۋدا ۇستاۋدى تاپسىردى.

سونداي-اق, ءوڭىر باسشىلىعىنا كارانتين رەجيمىن ساقتاۋ قاجەتتىلىگى تۋرالى حالىق اراسىندا ءتۇسىندىرۋ جۇمىستارىن كۇشەيتۋ تاپسىرىلدى. جۇمىس ساپارىنىڭ بارىسىندا ۆيتسە-پرەمەر 200 توسەكتىك ءمودۋلدى جۇقپالى اۋرۋلار اۋرۋحاناسى قۇرىلىسىنىڭ بارىسىمەن تانىستى, وبلىستى ءدارى-دارمەكپەن قامتۋداعى تۇراقتاندىرۋ قورىنا جانە ايماقتىڭ ءدارىحانا جەلىلەرىنە 42 اتاۋ بويىنشا دارىلىك زاتتاردى جەتكىزەتىن «ىڭكار» جشس قويماسىنىڭ جۇمىسىمەن تانىستى. سونداي-اق, ە. توعجانوۆ اتىراۋ قالاسىنىڭ № 4 ەمحاناسىندا بولدى. بۇگىنگى كۇنى وڭىردە ءبىرىنشى بولىپ كەلۋشىلەردىڭ دەنە قىزۋىن اۆتوماتتى تۇردە ولشەيتىن روبوتتى ىسكە قوسقان ەمحانادا 343 مەديتسينا قىزمەتكەرى جۇمىس ىستەيدى. سونىمەن قاتار, ە.توعجانوۆ وڭىردە «جۇمىسپەن قامتۋدىڭ 2020 - 2021 جىلدارعا ارنالعان جول كارتاسى» باعدارلاماسى اياسىندا جۇرگىزىلىپ جاتقان التى جولاقتى اۆتوجولدىڭ قۇرىلىس جۇمىستارىنىڭ ساپاسىمەن جانە 600 ورىندىق مەكتەپ قۇرىلىسىنىڭ بارىسىمەن تانىستى.