202 ميلليون تەڭگە – شىمكەنتتىكتەردىڭ جىلۋعا عانا بەرەشەك سوماسى. كوممۋنالدىق قىزمەت اقىسىن ايلاپ ەمەس, ءتىپتى جىلداپ تولەمەيتىندەردىڭ كەسىرىنەن قوماقتى قارىزدار كوبەيىپ كەلەدى, دەپ حابارلايدى Egemen.kz
سوندىقتان جاۋاپتىلار پاتەر ارالاپ, قىزمەت تۇتىنۋشىلارىنا ەسكەرتۋ جاساۋعا ءماجبۇر. بىراق كەيبىر پاتەر يەلەرى ءتىپتى ەسىگىن دە اشپايدى ەكەن.
جىلۋ تاراتۋشى ورتالىقتىڭ ماماندارى بورىشكەرلەردىڭ ءۇيدى-ءۇيىن ارالاۋدان جالىقپايدى. بۇل جولى قالا ورتالىعىنداعى "سپورت" شاعىن اۋدانىنداعى قارىزى بار پاتەرلەردىڭ ەسىكتەرىنەن سىعالاۋدا. ايتۋلارىنشا, ەڭ قارىزى كوپ تۇرعىندار قالانىڭ وسى ورتالىق بولىگىندە تۇرادى. بەرەشەگى 300 مىڭنان اسقان مىنا ۇيدەگىلەر پاتەر يەسى باسقا, كوممۋنالدىق قىزمەت اقىسىن تولەۋگە مىندەتتى ەمەسپىز دەپ اقتالدى. ال ءۇي يەسى جاڭا جىلعا دەيىن تولەيمىن دەپ سولەسۋدەن قاشقاقتادى.
پاتەرىن جالعا بەرۋشىلەرمەن جولىعۋ قيىننىڭ قيىنى دەيدى سالا ماماندارى. ءبىرى كۇندىز ۇيىندە بولماسا, ەكىنشىسى ەسىگىن دە اشپايتىن كورىنەدى.
جىلۋعا تولەمەيتىندەردىڭ قاتارى كوبەيسە دە, وسى كۇنگە دەيىن ولاردىڭ بىردە-ءبىرى جۇيەدەن اجىراتىلماپتى. كارانتيندىك رەجيمدە تۇرعىندار جاعدايىن تومەندەتكەنى بار. سوندىقتان ازىرگە تەك تۇسىندىرۋمەن شەكتەلىپ جاتىرمىز دەيدى ماماندار.
"بۇگىنگى تاڭعا دەبيتورلىق قارىزىمىز قالا بويىنشا 73169 ابونەنتتى قۇرايدى. ونىڭ ىشىندە 202 ملن تەڭگە بەرەشەك قارىزىمىز بار. اتاپ ايتقاندا, اباي اۋدانىندا 27 ملن, ءال-فارابي اۋدانىندا 62 ملن, ەڭبەكشىدە 68 ملن, قاراتاۋ اۋدانىندا 43 ملن-دى قۇراپ وتىر", دەدى "قۋاتجىلۋورتالىق" مەكەمەسىنىڭ ءبولىم باسشىسى اسقار بولەشوۆ.
سوندا دا بورىشكەرلەرمەن كۇرەس توقتامايدى. قارىزدى قايتارۋ ءۇشىن سوتقا جۇگىنۋگە ءماجبۇرمىز دەيدى جاۋاپتىلار. وسى كۇنگە دەيىن سوت ارقىلى 8 ملن تەڭگەگە جۋىق قارجى وندىرىلگەن. بىراق ودان جاعداي تۇبەگەيلى وزگەرمەيتىنى انىق. ويتكەنى قالادا 73 مىڭنان اسا بورىشكەر بار. ولاردىڭ بارلىعىنىڭ بەرەشەگىنىڭ جيىنتىعى 202 ملن تەڭگەدەن اسادى.