قازاننىڭ 27-دە الماتىدا "التىن قالام 2020" ادەبي جۇلدەسىنىڭ قورىتىندىسى جاريالانىپ, جەڭىمپازداردىڭ ەسىمى بەلگىلى بولدى. بيىل بۇل شارا باۋىرجان وسپانوۆ جەتەكشىلىك ەتەتىن "ZHERSU" ينۆەستيتسيالىق-وندىرىستىك كورپوراتسياسىنىڭ قولداۋىمەن ۇيىمداستىرىلدى.
"التىن قالام 2020" بايقاۋىنا قازاقستان, رەسەي, ۋكراينا, اقش, يزرايل, بەلورۋس ەلدەرىنەن, سونىمەن قاتار بيىل تۇڭعىش رەت موڭعوليا جانە ورتالىق افريكا رەسپۋبليكاسىنان بارلىعى 408 اۆتور قاتىستى. ورتالىق افريكا رەسپۋبليكاسىنا قونىس اۋدارعان قالامگەر ەلىمىزدەن جىراقتا جۇرسە دە تانىمال ادەبي جۇلدەدە كوپپەن بىرگە باق سىناۋعا بەل بۋعان.
ناۋرىزدىڭ 15-نەن قىركۇيەكتىڭ 15-نە دەيىن قابىلدانعان 600-گە جۋىق شىعارما بايقاۋدىڭ www.akalam.kz رەسمي سايتىندا جاريالانىپ, وقىرمانداردىڭ جانە قازىلاردىڭ ساراپتاۋىنان ءوتتى.
"التىن قالام" ادەبي جۇلدەسىنىڭ جەڭىمپازدارىن ماراپاتتاۋ شاراسى بيىل العاش رەت جابىق ەسىك فورماتىندا ۇيىمداستىرىلىپ, سالتاناتتى جيىنعا تەك جەڭىمپازدار مەن جوبا سەرىكتەستەرى جانە باق وكىلدەرى شاقىرىلدى. 19 قازاندا جاريالانعان بايقاۋدىڭ قىسقا تىزىمىنە ءار جانر بويىنشا جەتى شىعارمادان ەنگىزىلگەن ەدى. قازىلار شەشىمىمەن سولاردىڭ ىشىندەگى ەڭ ۇزدىك ءبىر شىعارما عانا ماراپاتتالدى.
ەسەنقۇل مامانوۆ اتىنداعى باس جۇلدە – 1 000 000 ملن تەڭگەنى الماتىلىق زامان تولەۋوۆ جەڭىپ الدى. جازۋشىنىڭ "قاراقۋىس" رومانى "ۇزدىك قازاق رومانى" اتالىمى بويىنشا ۇزدىك دەپ تانىلدى. تاعى ءبىر باستى سىيلىق – 1 000 000 تەڭگەنى بالالار شىعارماشىلىعىنا ارنالعان "دارابوز" بايقاۋىندا وزگەدەن وزا شاپقان پاۆلودارلىق قالامگەر الپىسباي حونج يەلەندى.