اۋىزسۋ جۇيەلەرىن رەكونسترۋكتسيالاۋعا قانشا قاراجات ءبولىندى؟

اۋىلداردىڭ سۋمەن جابدىقتالۋىنا مونيتورينگ جۇرگىزۋ ماقساتىندا ينتەراكتيۆتى كارتا ازىرلەپ, ىسكە قوستىق. وندا كوپتەگەن پارامەترى بويىنشا ناقتى جاعداي كورسەتىلگەن.

ورتالىق جانە جەرگىلىكتى اتقارۋشى ورگاندار اراسىنداعى قۇزىرەتتى ءبولۋ بويىنشا زاڭ جوباسى ازىرلەندى.

تىزبەنى بەكىتۋ فۋنكتسياسىن, سونداي-اق اۋىزسۋعا تولەم مولشەرىن ازىرلەۋ نورمالارىن بەكىتۋدى جەرگىلىكتى اتقارۋشى ورگاندارعا بەرۋ جوسپارلانعان.

زاڭ جوباسىندا كورسەتىلگەن شارالاردى ىسكە اسىرۋ مىناداي مۇمكىندىكتەر بەرەدى:

- سالىنعان وقشاۋ جۇيەلەردى تىزبەگە ەنگىزۋدى جەدەلدەتەدى; - وڭىرلەرگە اۋىزسۋمەن جابدىقتاۋعا ارنالعان سۋبسيديانى ءبولۋ مەن الۋدى تەزدەتەدى; - وبلىس بويىنشا ورتاشا تاريف پەن ءوڭىردىڭ الەۋمەتتىك-ەكونوميكالىق دامۋىن ەسكەرە وتىرىپ, 1 تەكشە مەتر اۋىزسۋ ءۇشىن حالىقتىڭ تولەمىن رەتتەيدى.

ەلباسىنىڭ تاپسىرماسىنا سايكەس  ەلىمىزدىڭ 53 قالاسىندا كارىزدىك-تازارتۋ قوندىرعىلارىن سالۋ جانە جاڭعىرتۋ جوبالارىن ىسكە اسىرۋعا دايىندىق جۇرگىزىپ جاتىرمىز.

5 قالادا كارىزدىك-تازارتۋ قوندىرعىلارىن سالۋ مەن رەكونسترۋكتسيالاۋ بويىنشا تەحنيكالىق-ەكونوميكالىق نەگىزدەمە ازىرلەندى. ساراپتاما وڭ قورىتىندىسىن بەردى. بۇل جوبالاردى شامامەن 40 ملرد تەڭگە مولشەرىندە ازيا دامۋ بانكى قارىزى ەسەبىنەن ىسكە اسىرۋ جوسپارلانعان.

6 قالا بويىنشا تەحنيكالىق-ەكونوميكالىق نەگىزدەمە  ازىرلەنىپ, ساراپتاماعا جىبەرىلدى. قۇنى شامامەن 90 ملرد تەڭگە بولاتىن ول جوبالاردى ەۋروپالىق قايتا قۇرۋ جانە دامۋ بانكىنىڭ قاراجاتى ەسەبىنەن ىسكە اسىرۋ جوسپارلانعان.

الەمدەگى پاندەمياعا بايلانىستى جوبالاردى ىسكە اسىرۋ 2021 جىلدىڭ ءبىرىنشى جارتى جىلدىعىنا اۋىستىرىلدى.