قىتاي كوممۋنيستىك پارتياسىنىڭ ءۇشىنشى جابىق پلەنۋمىندا سوڭعى 30 جىل بويى قولدانىستا بولىپ كەلگەن «ءبىر وتباسىنا – ءبىر بالا» ساياساتى قايتا قارالدى. بۇل تۋرالى NTD تەلەارناسى حابارلادى.
ەندى الداعى ۋاقىتتا قىتايلىق ەرلى-زايىپتىلاردىڭ بىرەۋى ءوزى شىققان وتباسىنىڭ جالعىز پەرزەنتى بولسا, وندا ولارعا ەكى بالا دۇنيەگە اكەلۋگە رۇقسات بەرىلەتىن كورىنەدى.
قىتايدا «جالعىز بالا» ساياساتى 1980 جىلدان بەرى جۇرگىزىلىپ كەلەدى. سودان بەرى بۇل ەلدە ميلليونداعان ايەل بالا كوتەرمەۋدىڭ, ونى دۇنيەگە اكەلمەۋدىڭ ءتۇرلى جولدارىنا جۇگىنگەن.
«جالعىز بالا» ساياساتى ءۇشىن قىتاي بيلىگى ءوز حالقى تاراپىنان تالاي-تالاي سىن-ەسكەرتپەلەر ەستىدى. كوپتەگەن قۇقىق قورعاۋشىلار «جالعىز بالا» ساياساتى ارقىلى قىتايدا ادام, ونىڭ ىشىندە انا مەن بالا قۇقىعى بۇزىلىپ وتىرعانىن ايتۋمەن كەلەدى. ءتىپتى, بۇل ساياساتتى قىلمىسقا بالاعاندار دا تابىلدى. جالپى, كوپتەگەن قىتايلىقتار «جالعىز بالا» ساياساتىن مۇلدە توقتاتۋ كەرەك دەپ ەسەپتەيدى.
«قىتاي ايەلدەرىنىڭ قۇقىعى» ۇيىمىن قۇرۋشى چجان تسزين دەگەن قىتاي ايەلى: «نارەستەنىڭ تۋىلۋعا قاقى بار, وعان دۇنيەگە كەلۋ قۇقىعىن كومپارتيا ەمەس, قۇداي بەرەدى. سابيلەردىڭ ومىرگە كەلۋ-كەلمەۋىنە پارتيانىڭ ارالاسپاۋى كەرەك. كومپارتيا كوپ جىلدان بەرى وسىلايشا ادام قۇقىعىن اياق استى ەتىپ كەلەدى», – دەپتى.
مامانداردىڭ ايتۋىنا قاراعاندا, قىتايدا تۇرعىنداردىڭ تىعىز ورنالاسۋى ەشقانداي ماسەلە تۋدىرىپ وتىرماعان كورىنەدى. مۇندا تەك حالىقتى دۇرىس ورنالاستىرا بىلمەگەندىكتەن تۋىنداعان تۇيتكىلدەر بار. سوندىقتان, قىتاي ءۇشىن تۇرعىنداردى دۇرىس جايعاستىرا الاتىن ساياسات كەرەك.
بۇگىندە قىتاي بيلىگىنىڭ «جالعىز بالا» ساياساتىنا قاتىستى «جۇمسارعان كوڭىلىنە» قاراپ كوپتەگەن قۇقىق قورعاۋشىلار ەل بيلىگى ادام قۇقىعىنا قۇرمەتپەن قاراي باستادى دەگەن وي تۇيۋدە. دەگەنمەن, قىتاي بيلىگى ءوزى تۇزگەن «جالعىز بالا» ساياساتىن ادام قۇقىعىن قورعاۋ ءۇشىن ەمەس, ەكونوميكالىق سەبەپتەرگە بايلانىستى وزگەرتە باستاعانىن تۇسىنگەنىمىز ءجون. ويتكەنى, بۇگىندە قىتاي حالقى «قارتايىپ بارادى». سونىڭ سالدارىنان الداعى ۋاقىتتا قىتايدا جۇمىس كۇشىنىڭ تاپشىلىعى بايقالۋى مۇمكىن. ەگەر ەڭبەككە جارامدى توپ ازايىپ كەتسە, ەكونوميكالىق تۇرعىدا دامۋ بولمايتىنىن قىتايلىق اتقا مىنەرلەر جاقسى ءتۇسىنىپ وتىر.
بىرىككەن ۇلتتار ۇيىمىنىڭ ەسەبى بويىنشا 2030 جىلعا دەيىن قىتايدا 67 ميلليونعا جۋىق جۇمىس قولى ازايادى ەكەن.
قازىردەن باستاپ قىتاي ىشكى دەموگرافيالىق جاعدايىنا مۇقيات بولماسا, بۇل سالادا تەپە-تەڭدىك ۇستاماسا, كۇردەلى ماسەلەلەرمەن بەتپە-بەت كەلۋى ابدەن مۇمكىن.
جولدىباي بازار.