نۇر-سۇلتان قالالىق جاستار ساياساتى ماسەلەلەرى باسقارماسى ۇيىمداستىرعان "ۇزدىك جاس وتباسى" جالپىقالالىق بايقاۋى اياقتالدى, دەپ حابارلايدى Egemen.kz
بايقاۋعا ەلوردانىڭ 100-گە جۋىق جاس وتباسى قاتىستى. ءۇش كەزەڭنەن تۇراتىن ىرىكتەۋ كەزەڭى ونلاين رەجىمىندە وتكىزىلىپ, 10 وتباسى فينالعا ءوتتى.
"بايقاۋدىڭ باستى ماقساتى – وتباسىلىق قۇندىلىقتاردى ناسيحاتتاۋ. ەرەجەگە سايكەس جارىس ءتورت كەزەڭدە ءوتتى. ءبىرىنشى كەزەڭدە قاتىسۋشىلار "بۇل سايىستا نەلىكتەن ءبىز جەڭۋىمىز كەرەك؟" دەگەن سۇراققا جاۋاپ بەرە وتىرىپ, ۆيدەو پرەزەنتاتسيا دايىندادى. ىرىكتەۋ كەزەڭىنەن وتكەن 80 وتباسى مەسسەندجەرلەردەگى جالپى چاتقا قوسىلدى جانە ولارعا كەلەسى كەزەڭدەرگە تاپسىرمالار بەرىلدى.
ەكىنشى كەزەڭدە "Birgemiz" جوباسى اياسىندا قاتىسۋشىلار ۆولونتەرلىكپەن اينالىستى. ءۇشىنشى كەزەڭدە "وتباسى – باقىت مەكەنى" تاقىرىبىندا ەسسە جازۋ قاجەت بولدى. قازىلار القاسى جازباشا جۇمىستاردىڭ ساۋاتتىلىعىنا جانە مازمۇنىنا باعا بەردى", دەدى جاستار ساياساتى ماسەلەلەرى باسقارماسى باسشىسى باقىتجان جۇنىسبەكوۆ.