كەنشىلەر استاناسىندا "دۇنيەگە كەلەر ءالى تالاي قاسىم…" اتتى رەسپۋبليكالىق ءمۇشايرا ءوتتى, دەپ حابارلايدى Egemen.kz.
بيىلعى جىر بايگەسىنە ەلىمىزدىڭ تۇپكىر-تۇپكىرىنەن 97 اقىن قاتىسىپ, ولەڭنەن ونەر جارىستىردى.
بەلگىلى سىنشى امانگەلدى كەڭشىلىك ۇلى توراعالىق ەتكەن قازىلار القاسىنىڭ شەشىمىمەن ءمۇشايرانىڭ باس بايگەسىنە رەسپۋبليكالىق "قازاق ادەبيەتى" گازەتىنىڭ ءبولىم مەڭگەرۋشىسى, اقىن باتىرحان سارسەنحان لايىقتى دەپ تانىلدى.
جىر دوداسىنىڭ ءبىرىنشى جۇلدەسى قاراعاندىلىق اقىن جانات جاڭقاش ۇلىنا بۇيىرسا, ەكىنشى ورىندى نۇر-سۇلتان قالاسىنان كەلىپ قاتىسقان ايدىن بايىس پەن جادىرا بايبۇلانوۆا ءوزارا ءبولىستى.
ال ءۇشىنشى جۇلدە قىزىلوردالىق دينا بوكەباي, الماتىلىق اسىل سۇلتانعازى, جامبىلدىق عاينيكەن رايىمبەكوۆا جانە ەلوردالىق ۇمتىل زارىققان سىندى ءتورت اقىنعا تەڭدەي ءبولىنىپ تابىس ەتىلدى.
سونىمەن قاتار, سىرباي ماۋلەنوۆ اتىنداعى ارنايى جۇلدەگە ورالدىق نۇرتىلەۋ قادىرقۇلوۆ يە بولسا, عافۋ قايىربەكوۆ اتىنداعى جۇلدە استانالىق ءبىرجان احمەرگە بەرىلدى. جۇمەكەن ناجىمەدەنوۆ اتىنداعى جۇلدەنى سەمەيلىك ازامات سەرىكوۆ, كەڭشىلىك مىرزابەكوۆ اتىنداعى جۇلدەنى قاراعاندىلىق جۇلدىز مولداعاليەۆا جانە ءداۋىتالى ستامبەكوۆ اتىنداعى جۇلدەنى الماتىلىق اسلان تىلەگەن الدى.
جەڭىمپاز جانە جۇلدەگەر بولعان شايىرلاردى قوعام قايراتكەرى رىمبالا وماربەكوۆا, بەلگىلى اقىندار سەرىك اقسۇڭقار ۇلى, عالىم جايلىباي جانە قازاقستان جازۋشىلار وداعى وبلىستىق فيليالىنىڭ توراعاسى سەرىك ساعىنتاي ماراپاتتادى.
قاراعاندى وبلىسى