تۇمەن وبلىسىنىڭ يشيم قالاسىندا ونلاين قازاق سىنىبى اشىلدى, دەپ حابارلايدى Egemen.kz
اتالمىش جوبا "وتانداستار قورى" كەاق قولداۋىمەن جۇزەگە اسىرىلدى. ونلاين سىنىپ اشۋعا قاجەتتى ينتەراكتيۆتى قۇرىلعىلار "تۇمەن وبلىسى قازاقتارىنىڭ ۇلتتىق مادەني اۆتونومياسىنا" تاپسىرىلدى.
"بالالاردىڭ قۋانىشىندا شەك جوق. وسى قۇرىلعىلار ارقىلى ولار قازاق ءتىلىن ونلاين ۇيرەنىپ قانا قويماي, شەتەلدە تۇراتىن قازاق بالالارىمەن دوستاسۋ مۇمكىندىگىنە يە بولادى. اتا-انالار تاراپىنان وتانداستار قورىنا شەكسىز العىسىمىزدى بىلدىرەمىز. جاڭا جىلدا تاريحي وتانىمىزدان ەرەكشە سىيلىق بولدى. مەرەكەدەن سوڭ ەكىنشى ينتەراكتيۆتى قۇرىلعىلار توپتاماسىن ۋپوروۆا اۋدانىنداعى قازاق سىنىبىنا تاپسىرامىز", دەيدى ورتالىق توراعاسى ەسەنعالي يبراەۆ.
"وتانداستار قورى" كەاق قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ تاپسىرماسىمەن 2020 جىلى 12 ەلدە 31 ونلاين سىنىپ اشۋدى جوسپارلاپ وتىر.