قازاقستان ۆاليۋتاسىنىڭ 20 جىلدىعىنا بايلانىستى 20 مىڭ تەڭگەلىك بانكنوت شىقتى. ونىڭ ەسكيزى ۇلتتىق بانك وتكىزگەن ءباسپاسوز ءماسليحاتىندا كورسەتىلدى. بۇل تۋرالى تەngrinews.kz ءتىلشىسى حابارلادى.
«بۇل ەشقانداي دا ينفلياتسيالىق ۇدەرىسكە بايلانىستى شىعارىلىپ وتىرعان جوق», - دەدى وسىعان وراي ۇلتتىق بانكتىڭ توراعاسى قايرات كەلىمبەتوۆ.
20 مىڭ تەڭگەلىك بانكنوتتىڭ ۇلگىسىن مەملەكەت باسشىسىنا ۇلتتىق بانكتىڭ بۇرىنعى توراعاسى گريگوري مارچەنكو كورسەتكەن ەكەن. سوندىقتان وندا سول كىسىنىڭ قولى قويىلادى. قازاقستاندىقتار جاڭا نومينالدى اقشانىى جىل سوڭىنا دەيىن كورىپ قالادى.
«ەكسپرەسس-ك» گازەتىنىڭ جازۋىنشا, قايرات كەلىمبەتوۆ تەڭگەنىڭ ايتارلىقتاي قۇنسىزداناتىنىن كورىپ وتىرعان جوق. سەبەبى, بۇعان ناقتى ەكى نارسە – مۇنايدىڭ الەمدىك باعاسىنىڭ ءتۇسىپ كەتۋى مەن رەسەي ءرۋبلىنىڭ دەۆالۆاتسياسى اسەر ەتەدى. ال بۇلاردىڭ ەكەۋىنەن دە قازىر كورىنىپ تۇرعان قاۋىپ جوق. بيىلعى جىلدىڭ قورىتىندىسىنداعى ينفلياتسيا دەڭگەيى 6 پايىزدان تومەندەۋ بولادى. قازاقستاننىڭ جالپى حالىقارالىق رەزەرۆى 16 پايىزعا تومەندەدى. الايدا, كەلىمبەتوۆ ەلىمىزدىڭ التىن زاپاسىنا قوسا, الداعى ۇلتتىق قوردىڭ 100 ملرد. دوللارعا جەتەتىنىنە سەنىمدى.
ۇلتتىق بانكتىڭ توراعاسى قازىرگى ۇلكەن پروبلەما رەتىندە تۇتىنۋ كرەديتىنىڭ قاتتى ءوسىپ بارا جاتقانىن اتادى. قازىر يپوتەكالىق كرەديت بەرۋ رىنوگىنداعى 2004-2007 جىلدارداعىداي جاعدايدىڭ قايتالانباۋى ءۇشىن بارلىق شارالار جاسالىپ جاتىر. تاعى ءبىر پروبلەما قازاقستاننىڭ ەكىنشى دەڭگەيلى بانكتەرى پورتفەلدەرىندەگى جۇمىس ىستەمەي تۇرعان كرەديتتەر توڭىرەگىنەن تۋىندايدى.
ەندى 20 مىڭ نومينالى بار تەڭگەنىڭ كەسكىنىنە كەلەيىك. ونىڭ ءبىر بەتىندە قىزدىڭ بەت ءجۇزى كورىنىپ تۇر. ول ەركىندەۋ كيىنگەن. قىز توردان قۇستى ۇشىرىپ شىعارۋدا. ال قۇس كۇنگە قاراي بەت الىپ بارادى. ال ەكىنشى بەتتە سول قۇس توردان شىققان قۇس ورمان القابىنىڭ فونىندا ۇشىپ بارادى.
ساكەن مايلىباي.