"تازا جۇرەك" اۋىلدىقتارعا تەگىن قىزمەت كورسەتەدى

جامبىل وبلىستىق جاستار ساياساتى ماسەلەلەرى باسقارماسىنىڭ باستاماسىمەن ۇيىمداستىرىلعان شارا "ساۋلىق" جالپىۇلتتىق جوباسى اياسىندا ىسكە اسىپ وتىر. اتالعان كەرۋەننىڭ قۇرامىندا تاجىريبەلى كارديولوگتار مەن ۆولونتەرلار بار. جولعا شىققان ءموبيلدى توپ وڭىردەگى شالعاي اۋىل تۇرعىندارىنا تەگىن مەديتسينالىق قىزمەت كورسەتەدى. ول ءۇشىن بارلىق مۇمكىندىكتەر قاراستىرىلعان.

"تازا جۇرەك" كەرۋەنىن اۋىلدارعا شىعارىپ سالۋ سالتاناتىنا جامبىل وبلىسىنىڭ اكىمى بەردىبەك ساپارباەۆ ارنايى قاتىسىپ, ادامنىڭ ءومىرى مەن دەنساۋلىعى ءۇشىن ايانباي ەڭبەك ەتىپ جۇرگەن مەديتسينا قىزمەتكەرلەرىنە العىس ايتتى. سونىمەن قاتار, كوروناۆيرۋس ىندەتىمەن كۇرەس كەزىندە دە الدىڭعى شەپتە جۇرگەن دارىگەرلەردىڭ ەڭبەگى ەرلىكپەن بىردەي ەكەنىن جەتكىزدى. "مەملەكەت باسشىسى "ەلىمىزدىڭ ءاربىر ازاماتىنىڭ دەنساۋلىعى – بۇل رەسپۋبليكامىزدىڭ جەتىستىگى" دەگەن بولاتىن. مەديتسينا سالاسىن قولداۋ, ونى تۇراقتى تۇردە دامىتۋ مەملەكەتتىڭ نەگىزگى باسىمدىقتارىنىڭ ءبىرى. مەديتسينا سالاسىن قارجىلداندىرۋ, مەكەمەلەردى زاماناۋي تۇرعىدا جابدىقتاۋ نازاردان تىس قالعان ەمەس. جامبىل وبلىسى بويىنشا كوروناۆيرۋس ىندەتىمەن كۇرەس ءۇشىن جالپى 4 ميلليارد 885,1 ميلليون تەڭگە ءبولىندى. بۇل قاراجاتتىڭ 218,4 ميلليون تەڭگەسىنە ەكى ينفەكتسيالىق ستاتسيوناردا كۇردەلى جوندەۋ جۇمىستارى جۇرگىزىلىپ, نىساندار قاجەتتى قۇرال-جابدىقتارىمەن قامتاماسىز ەتىلدى», دەدى بەردىبەك ساپارباەۆ. سونداي-اق, 4 مەديتسينالىق ۇيىمعا وتتەگى ستانتسيالارى, 3 دانا كومپيۋتەرلىك توموگراف, 4 دانا تسيفرلى, 2 دانا جىلجىمالى رەنتگەن اپپاراتتارى جانە 2 دانا ەكمو اپپاراتى ورناتىلعان. سونىمەن قاتار, 250 دانا كوپفۋنكتسيونالدى, 50 دانا راەنيماتسيالىق توسەكتەر ساتىپ الىنعان. ودان باسقا بىرقاتار مەديتسينالىق مەكەمەلەر 25 دانا ءپورتاتيۆتى, 53 دانا وكپەنى جاساندى جەلدەتۋ اپپاراتتارىمەن قامتىلعان. بۇگىندە جامبىل وبلىستىق جەدەل مەديتسينالىق جاردەم ستانساسىنا 65 جەدەل مەديتسينالىق جاردەم اۆتوكولىكتەرى  ساتىپ الىنىپتى.

سالتاناتتى شارا بارىسىندا بەردىبەك ساپارباەۆ اۋداندىق ەمدەۋ مەكەمەلەرىنە 8 دياگنوستيكالىق مەديتسينالىق كەشەننىڭ كىلتىن تابىستادى. ال, وبلىستىق جەدەل مەديتسينالىق جاردەم ستانساسى دا 18 مەديتسينالىق جەدەل جاردەم كولىگىمەن تولىقتى. كولىكتەردىڭ بارلىعى دا ناۋقاستارعا العاشقى مەديتسينالىق كومەك كورسەتۋ قۇرالدارىمەن جابدىقتالعان. سونداي-اق, دەنساۋلىق ساقتاۋ مەكەمەلەرىنە دە جاڭا جەدەل جاردەم كولىكتەرى بەرىلدى. جيىندا كوروناۆيرۋس ىندەتىمەن كۇرەس كەزىندە ەلەۋلى ەڭبەك ەتكەن بىرقاتار دارىگەرلەر قازاقستان رەسپۋبليكاسى پرەزيدەنتىنىڭ جارلىعىمەن تاعايىندالعان «حالىق العىسى» مەدالىمەن ماراپاتتالدى.

جامبىل وبلىسى