ۇلتتىق قوعامدىق سەنىم كەڭەسىنىڭ IV وتىرىسىندا كەڭەس مۇشەسى ايمان وماروۆا ادۆوكاتتاردىڭ الەۋمەتتىك قاۋىپسىزدىگىنە الاڭداۋشىلىق ءبىلدىردى, دەپ حابارلايدى Egemen.kz
ء"جۇسىپ بالاساعۇن ايتقانداي, ء"ادىل ءسوز اششى كورىنەدى". كەيبىر سوت ادۆوكاتتاردى اقيقاتتى ايتقانى ءۇشىن قىسىمعا الاتىنىنا كۋا بولدىم. "بارلىق ازاماتتاردىڭ قىزمەتتىك جايى مەن الەۋمەتتىك مارتەبەسىنە قاراماستان زاڭ الدىندا تەڭ بولۋى كەرەك" دەگەن ءسوز ءاربىر قازاقستاندىقتىڭ ساناسىندا سايراپ تۇرۋى ءتيىس. سوندا عانا زاڭنىڭ ۇستەمدىگى ءوز بيىگىندە قالادى. سوتتاردا پروكۋروردىڭ, اندا-ساندا كەلەتىن مەدياتورلاردىڭ بولمەسى بار. ال سوت ىشىنەن شىقپايتىن ادۆوكاتتاردىڭ بولمەسى دە جوق", دەدى ول.
سونداي-اق ول اۋىلدا ادۆوكاتتاردىڭ جەتىسپەيتىنىن, كوپشىلىگىندە ماتەريالدىق جاعدايى تومەن ەكەنىن باسا ايتتى.
"ادۆوكاتتاردىڭ الەۋمەتتىك قاۋىپسىزدىگى. مۇنداعى ايتپاعىم, ادىلدىك جولىندا باسىن بايگەگە تىگۋگە ءازىر جاندار ءۇشىن قاراپايىم ەڭبەككە جارامسىزدىق پاراعىنا قاراجات قاراستىرىلمايدى. تابىس پەن زەينەتاقى جارنالارىنا 10 پايىز مولشەرىندە قوسارلانعان سالىق سالىنادى. قىزىعى سول, قۇقىق قورعاۋ, سوت ورگاندارى ءۇشىن تەگىن جۇزەگە اسىرىلاتىن زاڭ كومەگى اقپاراتتىق جۇيەسىنە ادۆوكاتتار ايىنا 6 مىڭ تەڭگەنىڭ ۇستىندە قاراجات جۇمساۋى كەرەك. نەگە ولاي؟", دەدى ايمان وماروۆا.
بەلگىلى ادۆوكات حالىقتىڭ قۇقىقتىق ساۋاتتىلىعىن ارتتىرۋ باعىتىندا اتقارىلىپ جاتقان جۇمىستارعا دا توقتالىپ ءوتتى.
"زاڭ ادام پايداسىنا جازىلادى. ادام زاڭ ءۇشىن تۋمايدى". قوعام قايراتكەرى ءاليحان بوكەيحاننىڭ وسىناۋ ورەلى ويى جىلدار جىلجىعان سايىن قۇندىلىعىن ارتتىرىپ كەلەدى. راسىندا, ءادىل زاڭ قوعام دامۋىنىڭ ىرگەتاسى. مۇنداعى باستى ماسەلە قاراشا حالىقتىڭ قۇقىقتىق ساۋاتتىلىعىن ارتتىرۋ بولىپ تۇر. وسى ماقساتتا سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆپەن بىرلەسىپ, "ادال كومەك" جوباسىنا جەتەكشىلىك ەتۋدەمىن. وسى جىلدىڭ اقپان ايىندا باستالعان جوبا از ۋاقىتتا كوپشىلىكتىڭ ىقىلاسىنا بولەندى. بۇل تۇرعىدا ازاماتتىق قوعام مەملەكەتتىك ورگاندارعا كومەك بەرۋگە ءازىر. وعان "ادال كومەك" تۇعىرناماسىن قۇرۋ ارقىلى كوزىمىز جەتىپ وتىر. سوڭعى مالىمەت بويىنشا 2 ملن 200 مىڭنان استام ازامات تىكەلەي ەفيردى كورىپ, ونىڭ 26 مىڭنان استامى جوبا اياسىندا قۇقىقتىق كومەكتى تەگىن الدى", دەدى ول.
ايمان وماروۆانىڭ ايتۋىنشا, "ادال كومەك" ارقىلى ەل ءىشىن كەزىپ ءجۇرىپ, ءتۇرلى تۇيتكىلدى ماسەلەلەرمەن بەتپە-بەت كەلگەن.
"ەلىمىزدەگى اسكەري زەينەتكەرلەر وتەماقىسىن الا الماي ءجۇر. سول سەكىلدى مۇمكىندىگى شەكتەۋلى تۇلعالاردىڭ دا تاعدىرى الاڭداتارلىق. الەۋمەتتىڭ الەۋەتىن كوزبەن كورۋ ناتيجەسىندە "حالىق ءۇنى" جاڭا جوباسىنىڭ يدەياسى تۋىندادى. قازىرگى ۋاقىتتا جاڭا جوبانى اقپارات جانە قوعامدىق دامۋ ءمينيسترى ايدا بالاەۆامەن, "التىن قىران" قورىنىڭ توراعاسى يسلامبەك سالجانوۆپەن سەرىكتەسىپ جۇزەگە اسىرماقپىز", دەدى ايمان وماروۆا.