شاعىن جانە ورتا بيزنەستىڭ زارداپ شەككەن سالالارىنا مەملەكەت قولداۋ كورسەتەدى

ول بويىنشا داعدارىستان زارداپ شەككەن ەكونوميكا سەكتورلارىنداعى شاعىن جانە ورتا بيزنەسكە كومەك كورسەتىلەتىن بولادى.

ءداستۇرلى جولداۋىندا پرەزيدەنت قاسىم-جومارت توقاەۆ: "شاعىن جانە ورتا بيزنەس وتە قيىن كەزەڭدەردى باستان كەشىپ وتىر. پاندەميانىڭ سوقىسى الدىمەن سولارعا ءتيدى" – دەگەن ەدى.پرەزيدەنت ۇكىمەتكە شاعىن جانە ورتا بيزنەسكە مەملەكەت تاراپىنان قوسىمشا قولداۋ كورسەتۋدى, اتاپ ايتقاندا: نەسيەلەرىن جەڭىلدىكپەن قايتا قارجىلاندىرۋدى تاپسىرعان بولاتىن. جاڭا بەكىتىلگەن وزگەرىستەر بويىنشا, COVID-19 پاندەمياسىنان تۋىنداعان داعدارىس كەزىندە زارداپ شەككەن كاسىپكەرلەر 2020 جىلدىڭ 31 تامىزىنا دەيىن الىنعان ليزينگ مامىلەلەرى مەن نەسيەلەرىن "دامۋ" قورى ارقىلى ءىشىنارا سۋبسيديالاي الادى.

قولداۋ كورسەتىلەتىن كومپانيالار مەن كاسىپورىندار قاتارىنا جەكە ساۋدا سالاسىنداعى, قوناق ءۇي, تۋريستىك قىزمەت, كينوتەاتر, فيتنەس-ورتالىقتار, كولىك جوندەۋ مەن تەحسەرۆيس قىزمەتى, مەكتەپكە دەيىنگى جانە باستاۋىش ءبىلىم بەرۋ سەكىلدى قىزمەت كورسەتەتىن 29 ءتۇرلى سالا ەنگەن.

"وزگەرىس شارتتتارىنا سايكەس, كاسىپكەر نومنال مولشەرلەمەنىڭ تەك 6%-ىن عانا تولەيدى. ال ايىرماسىن مەملەكەت وتەپ بەرەدى", – دەدى "دامۋ" كاسىپكەرلىكتى دامىتۋ قورى" اق وكىلدەرى.

باعدارلاماعا قاتىسۋداعى باستى شارتاردىڭ ءبىرى – كاسىپكەردە 2020 جىلدىڭ 16 ناۋرىزى كۇنىن ەسەپكە العانداعى مەرزىمدە 180 كۇننەن اسقان نەسيە مولشەرلەمەسى جانە/نەمەسە نەگىزگى قارىزى بويىنشا كەشىكتىرۋ, قارىزى بولماۋى كەرەك.

قولداۋدىڭ جاڭا شاراسى 2020 جىلعى 16 ناۋرىز بەن 2021 جىلعى 15 ناۋرىز ارالىعىنداعى كەزەڭگە (سۋبسيديالاۋ كەزەڭى) كوزدەلگەن, بۇل رەتتە نەسيە بويىنشا سىياقىنىڭ نومينال مولشەرلەمەسى 16 ناۋرىز بەن 31 تامىز ارالىعىنداعى كەزەڭگە شەكتەلمەگەن, 2021 جىلعى 1 قىركۇيەك پەن 15 ناۋرىز ارالىعىنداعى كەزەڭگە 18%-دان اسپاۋعا ءتيىس.

مەملەكەتتەن قولداۋ الۋ ءۇشىن كاسىپكەرلەر بيىل 30 قازانعا دەيىن بانككە ءوتىنىم بەرۋى قاجەت, بۇدان ءارى «دامۋ» قورى بانكتەر بەرگەن تىزىلىمدەر مەن ساۋالناما-وتىنىشتەر نەگىزىندە 5 جۇمىس كۇنىنەن اسپايتىن مەرزىمدە سۋبسيديالاۋ مۇمكىندىگى تۋرالى شەشىم قابىلدايدى.