ەلىمىزگە اۆتوكولىكپەن كىرگەن 122 ادامنان ۆيرۋس انىقتالدى. بۇل تۋرالى دەنساۋلىق ساقتاۋ مينيسترلىگىنىڭ سانيتارلىق-ەپيدەميالىق باقىلاۋ كوميتەتىنىڭ ءتورايىمى ايجان ەسماعامبەتوۆا مالىمەت بەردى, دەپ حابارلايدى Egemen.kz
"وزدەرىڭىز بىلەتىندەي, باس مەملەكەتتىك سانيتاريالىق دارىگەردىڭ قاۋلىسىنا سايكەس 6 قازاننان باستاپ قازاقستاننىڭ مەملەكەتتىك شەكارالارىندا سانيتارلىق-كارانتيندىك باقىلاۋ جۇمىستارى كۇشەيتىلدى. بۇل – اۋە مەن اۆتوكولىك قوزعالىسى بويىنشا شەكتەۋ. وسىلايشا بۇگىنگە دەيىن 73 591 ازامات (قازاقستاندىق جانە شەتەلدىك ازاماتتار) اۆتوكولىكتى وتكىزۋ بەكەتتەرى ارقىلى ءوتتى. ولاردىڭ ىشىندەگى جولاۋشىلار – 21 279 ادام. پتر-انىقتاماسى جوق ازاماتتار ەكى كۇندىك كارانتينگە جاتقىزىلدى. ونداي ساناتتاعى جولاۋشىلاردىڭ سانى – 5967 ادام بولدى. ولاردىڭ ىشىندە 122 ادامنان كوروناۆيرۋس انىقتالدى", دەدى ايجان ەسماعامبەتوۆا وكق-دا وتكەن ءباسپاسوز ءماسليحاتىندا.
كوميتەت باسشىسى سونىمەن قاتار حالىقارالىق اۋە رەيستەرى ارقىلى قازاقستانعا 34 446 جولاۋشى كەلگەنىن, ولاردىڭ ىشىندە پتر-انىقتاماسى جوق 5 925 ادام كارانتيندىك ستاتسيونارعا جاتقىزىلعانىن ايتتى.
"سولاردىڭ ىشىندە 19 ادامنىڭ بويىنان كوروناۆيرۋس انىقتالدى. كوروناۆيرۋس جۇقتىرعان ازاماتتار تۇركيا, ءباا, بەلارۋس, رەسەي, مىسىر ەلىنەن كەلگەندەر", دەدى ول.