ماقتاارالداعى توسىننان تۋىنداعان سۋ تاسقىنىنىڭ تاقسىرەتىن تارتقان 386 وتباسى, دالىرەگى جەڭىس, جاڭاتۇرمىس, دوستىق اۋىلدارىنىڭ تۇرعىندارى اۋدان ورتالىعى مىرزاكەنتتەگى جاڭا قونىسقا كوشىپ, قۋانىشقا كەنەلۋدە, دەپ حابارلايدى Egemen.kz.
اپات اۋماعىندا قيراعان ۇيلەر قالپىنا كەلىپ, مىرزاكەنتتە جاڭا شاعىناۋدان بوي كوتەردى. قاز - قاتار تىزىلگەن اقشاڭقان ۇيلەردىڭ ارقايسىسىنىڭ اۋماعى 100 شارشى مەتر بولاتىن شاعىناۋداندا اۋىزسۋ, "كوگىلدىر وتىن" سياقتى ينفراقۇرىلىم ماسەلەسى تولىققاندى شەشىمىن تاپقان. ماقتاارالدىقتارعا تاڭسىق كارىز جۇيەسىنە دەيىن جۇرگىزىلگەن. ەكى ارالىقتا ءساندى ساياباعى جانە بار. كەلەر جىلى بۇل اۋماقتا 1200 ورىندىق مەكتەپ حالىق يگىلىگىنە ۇسىنىلماقشى. وسىلايشا ەلدىڭ ىنتىماعى مەن بىرلىگى, قولداۋى مەن قامقورلىعى, ەلباسىنىڭ سارابدال ساياساتى, مەملەكەت باسشىسى ق. توقاەۆتىڭ تاپسىرماسى, ۇكىمەتتىڭ كومەگى, وبلىس اكىمى ءو. شوكەەۆ باستاعان كوماندانىڭ ۇيىمداستىرۋ -ۇيلەستىرۋدەگى قاجىرلى ەڭبەگىنىڭ ناتيجەسىندە ماقتاارالدىقتاردىڭ باستان وتكەرگەن قيىندىقتارى كورگەن تۇستەي بولىپ, ءومىردىڭ جاڭا ءبىر بەلەسىن باستاماق.
قونىس يەلەرىنىڭ قۋانىشىن ءبولىسۋ ءۇشىن ماقتاارال اۋدانىنا ارنايى كەلگەن پرەمەر-ءمينيستردىڭ ورىنباسارى, توتەنشە جاعداي جونىندەگى رەسپۋبليكالىق كوميسسيانىڭ توراعاسى ر.سكليار, وزبەكستان رەسپۋبليكاسىنىڭ سۋ شارۋاشىلىعى ءمينيسترى ش.حامراەۆ, تۇركىستان وبلىسىنىڭ اكىمى ءو.شوكەەۆ تۇرعىنداردى قۇتتىقتاپ, باسپانا كىلتتەرىن تابىس ەتتى. سونىمەن قاتار, ماقتاارال اۋدانىندا ورىن العان توتەنشە جاعداي كەزىندە ەرەكشە قىزمەت اتقارعان ءبىر توپ ازاماتتارعا پرەمەر-ءمينيستردىڭ العىس حاتتارى تاپسىرىلدى. ولاردىڭ اراسىندا وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامراەۆ پەن توتەنشە جاعدايلار ءمينيسترىنىڭ ءبىرىنشى ورىنباسارى ابدۋللا كۋلداشوۆ تا بار. جاڭا شاعىناۋدان تۇرعىندارىنىڭ قۋانىشىنا ورتاقتاسقان وبلىس اكىمى ومىرزاق شوكەەۆ قيىندىقتىڭ ارتتا قالعانىن ايتىپ, ءار وتباسى ءۇشىن باسپانالارىنىڭ بەرەكەلى بولۋىن تىلەدى. سونداي-اق, وبلىس باسشىسى جاڭا مولتەك اۋداننىڭ قۇرىلىسىنا اتسالىسقان بىرقاتار ازاماتتارعا پرەزيدەنتتىڭ العىس حاتتارى مەن "حالىق العىسى" مەدالىن تابىس ەتتى. "ساردوبا سۋ قويماسىنداعى بوگەتتىڭ بۇزىلۋى شەكارالاس ەكى ەل ءۇشىن دە وڭايعا سوقپادى. اپات ايتىپ كەلمەيدى. وسى توسىن جاعدايدى ەستىپ, ماقتاارالدىقتاردىڭ تاعدىرىنا الاڭداعان ەلباسى نۇرسۇلتان نازارباەۆتىڭ قولداۋىمەن, پرەزيدەنت قاسىم-جومارت توقاەۆتىڭ تاپسىرماسىمەن مەملەكەتتىك دەڭگەيدە قولداۋ كورسەتىلدى. زارداپ شەككەن اۋىلداردىڭ ءاربىر ازاماتى قامقورلىقسىز قالمادى. بۇكىل ەل بولىپ كومەك قولىن سوزدى. قيىندىقتار ارتتا قالىپ, وسى ءسات ومىرلەرىڭىزدىڭ جارقىن كەزەڭى بولسىن", دەدى ومىرزاق شوكەەۆ.
اۋماعى 70 گەكتار جەردى الىپ جاتقان جاڭا قالاشىقتاعى 386 ۇيگە جەڭىس, جاڭاتۇرمىس جانە دوستىق ەلدى مەكەندەرىنىڭ تۇرعىندارى كوشىپ كەلەتىن بولادى. مۇندا بارلىق ينجەنەرلىك ينفراقۇرىلىم تارتىلعان. جوعارى جىلدامدىقتاعى ينتەرنەت جەلىسىنە قوسىلعان. سونداي-اق جاڭا شاعىناۋداندا 1200 ورىندىق مەكتەپ پەن بالا-باقشا جانە دارىگەرلىك امبۋلاتوريا سالىنۋدا. بالالاردىڭ ويىن الاڭدارى ورناتىلىپ, اعاشتار وتىرعىزىلعان. جەلىلىك ساياباق پەن گۇل باقتارى مولتەك اۋداننىڭ كوركىنە كورىك قوسىپ تۇر.
سالتاناتتى شارا سوڭى مەرەكەلىك كونتسەرتكە ۇلاستى. تۇرعىنداردىڭ قۋانىشىن بولىسكەن پرەمەر-ءمينيستردىڭ ورىنباسارى ر. سكليار مەن وبلىس اكىمى ومىرزاق شوكەەۆ باسپانالى بولعان 2 وتباسىنىڭ شاڭىراعىنا كىرىپ, قۇتتى بولسىن ايتتى.