اقتوبە وبلىسىندا ورمان القابىنىڭ كولەمى ۇلعايىپ كەلەدى

"اقتوبەدە جەتى ورمان شارۋاشىلىعى بار. جالپى اۋماعى 215 مىڭ گا اسادى. ونىڭ 49 مىڭ گا استامى ورمانمەن كومكەرىلگەن. بيىل قوسىمشا 823 گا قوسىلىپ, القاپ اۋماعى 50 مىڭ گا استى", دەيدى اقتوبە وبلىستىق تابيعي رەسۋرستار جانە تابياتتى پايدالانۋدى رەتتەۋ باسقارماسىنىڭ ءبولىم باسشىسى عابيت قىلىشباەۆ.

ءالى كۇنگە دەيىن وڭىردەگى 77 مىڭ گا اۋماق مەملەكەتتىك ورمان قورى اۋماعىنا الىنباعان. جەر تەلىمىن قايتارۋ ماقساتىندا ءتۇسىندىرۋ جۇمىستارى جۇرگىزىلىپ جاتىر. كەيبىرى شارۋاشىلىقتاردىڭ يەلىگىنە ءوتىپ كەتسە, كەيبىرى ءالى كۇنگە دەيىن بوس جاتىر.

"اۋماقتى قورعاۋ الىپ, كۇتىم جۇرگىزۋ كەرەك. كوبىنە ورتتەن قورعاۋ جۇمىسى جۇرگىزىلەدى. سونىمەن بىرگە زيانكەستەرگە قارسى باقىلاۋ جۇرگىزىلەدى. قازىرگى كەزدە 6 مىڭ گا ورمان شارۋاشىلىعىنىڭ يەلىگىنە ءوتتى. جۇمىس جالعاسا بەرسە, ورمانمەن كومكەرىلگەن القاپ كولەمى ارتادى", دەدى اقتوبە وبلىستىق تابيعي رەسۋرستار جانە تابياتتى پايدالانۋدى رەتتەۋ باسقارماسىنىڭ ءبولىم باسشىسى عابيت قىلىشباەۆ.

كوشەت ەگىلگەن تالىمباق اۋماعى اقتوبەدە 215 گا قۇرايدى. مۇندا جەرگىلىكتى اۋا رايىنا قولايلى كوشەت وتىرعىزىلىپ, تاراتىلادى. توپىراق زەرتتەۋ, كوشەت وتىرعىزۋدىڭ ءوز تەحنولوگياسى ساقتالۋى ءتيىس. بۇل جۇمىس اقتوبەدەگى 7 ورمان شارۋاشىلىعىندا ەڭبەك ەتەتىن 400-گە جۋىق ادامعا جۇكتەلگەن.