امەريكالىق اتاقتى ءانشى تينا تەرنەر اقش ازاماتتىعىنان باس تارتتى. بۇل تۋرالى Washington Post گازەتىنىڭ ينتەرنەت-نۇسقاسىندا تاراعان دەرەككە سۇيەنگەن «پراۆدا.رۋ» پورتالى حابارلادى.
ونلاين-گازەتتە اقش-تىڭ بەرندەگى ەلشىلىگىنىڭ دەرەگىنە سىلتەمە جاسالادى. وندا اتى اڭىزعا اينالعان ءانشىنىڭ ءوز ەركىمەن ازاماتتىقتان باس تارتاتىنى ايتىلعان. گازەت مالىمەتىنە قاراعاندا, 74 جاستاعى ءانشى ءوزىن امەريكامەن تەك وتباسى عانا جالعاپ تۇرعانىن العا تارتادى. كەلەشەكتە دە ول بۇل ەلدە تۇرۋعا نيەتتى ەمەس. بۇعان قوسا, سوڭعى 20 جىلدان بەرى شۆەيتساريادا نەمىس پروديۋسەرى ەرۆين باحپەن بىرگە تۇرىپ كەلە جاتىر. ولار وتكەن جىلى جازدا ۇيلەنىپتى. وسىدان شامالى عانا ۋاقىت بۇرىن ءانشى شۆەيتساريانىڭ ازاماتتىعىن الىپ ۇلگەرىپتى.
حالىقارالىق Grammy سىيلىعىن سەگىز مارتە جەڭىپ العان ءانشى ءوزىنىڭ ساحنالىق مانسابىن 2009 جىلى اياقتاپتى.
مۇرات ايتقوجا.