سەمەيگە جاساعان جۇمىس ساپارى بارىسىندا قاسىم-جومارت توقاەۆ جالپى كولەمى 203 گەكتاردى بولاتىن قاراعايلى ىقشاماۋدانىندا سالىنىپ جاتقان قۇرىلىس جۇمىستارىنىڭ قارقىنىمەن تانىستى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ىقشاماۋدانداعى تۇرعىن-ءۇي قورى 787,7 مىڭ شارشى مەتر. فيزيكا-ماتەماتيكا پاندەرىن تەرەڭدەتىپ وقيتىن 720 وقۋشىعا ارنالعان نازارباەۆ زياتكەرلىك مەكتەبىنىڭ قۇرىلىسى اياقتالعان. جانىندا 120 ورىندىق جاتاقحاناسى بار. سونىمەن قاتار مەملەكەتتىك-جەكەمەنشىك ارىپتەستىك اياسىندا 320 ورىندىق بالا باقشا سالىنعان. جۋىردا قاراعايلى ىقشام اۋدانىندا 1405 پاتەرلىك 20 تۇرعىن ءۇي پايدالانۋعا بەرىلگەن.
سونداي-اق قاراعايلىدا 3 مەكتەپ, 6 بالا باقشا, مۇز ءمودۋلى جانە وڭالتۋ ورتالىعى سالىنادى.
مەملەكەت باسشىسىنىڭ تۇرعىن ءۇي قۇرىلىسىن دامىتۋعا قاتىستى تاپسىرماسى ءوز ناتيجەسىن بەرۋدە. سوڭعى ەكى جىلدا 200-دەن استام مۇقتاج وتباسىنا قاراعايلى ىقشاماۋدانىنان پاتەر بەرىلگەن. كوپبالالى انالارمەن كەزدەسكەن پرەزيدەنت مەملەكەت الەۋمەتتىك قولداۋدى جالعاستىرا بەرەتىنىن ايتتى.
– ۇكىمەت كوپبالالى انالارعا, مۇقتاج وتباسىلارعا ۇدايى كومەك بەرىپ كەلەدى. ءارتۇرلى جەڭىلدىكتەر قاراستىرىپ وتىر. ەڭ باستىسى وزدەرىڭىزدەي كوپ بالالى انالاردىڭ ەڭبەككە ەرەكشە دەگەن تالپىنىسى قۋانتادى. بالا تاربيەسىمەن اينالىسىپ قانا قويماي, حالىقتى جۇمىسپەن قامتىپ وتىرعان يگى ىستەرىڭىز وزگەلەرگە ۇلگى بولۋى كەرەك. سوندىقتان سىزدەردى ءاردايىم قولداي بەرەمىز, – دەدى قاسىم-جومارت توقاەۆ.
كوپبالالى انالار "ەڭبەك" مەملەكەتتىك باعدارلاماسى شەڭبەرىندە كورسەتىلىپ جاتقان قولداۋعا, كامەلەتتىك جاسقا تولماعان 4 جانە ودان دا كوپ بالاسى بار وتباسىلارعا بەرىلەتىن الەۋمەتتىك جاردەماقى سوماسىنىڭ ۇلعايۋىنا, سەمەيدى دامىتۋدىڭ كەشەندى جوسپارىنىڭ قابىلدانۋىنا قاتىستى العىستارىن ايتتى. سونىمەن قاتار وتباسىلىق بيزنەستى دامىتۋعا بەرىلەتىن گرانتتاردىڭ ءتىزىمىن كەڭەيتۋ, گرانت سوماسىن ۇلعايتۋ جونىندەگى ۇسىنىستارىن جەتكىزدى.
پرەزيدەنت قاراعايلى ىقشاماۋدانىنداعى بىرەگەي سپورت كەشەنىن ارالاپ كورىپ, مۇنداي نىسان قازاقستاننىڭ ءار قالاسىندا سالىنۋى قاجەت ەكەنىن اتاپ ءوتتى.