قاجەتتى جابدىقتار اۋداندارعا جەتكىزىلۋدە

وبلىس اكىمى ومىرزاق شوكەەۆتىڭ تاپسىرماسىمەن اۋداندىق اۋرۋحانالار كومپيۋتەرلىك توموگرافپەن, پتر زەرتحانالارىمەن جانە تسيفرلى رەنتگەندەرمەن جابدىقتالدى. وكپەنى جاساندى جەلدەتۋ اپپاراتتارى مەن وتتەگى كونتسەنتراتتارى دا ءار اۋدانداعى ەمدەۋ مەكەمەلەرىنە تاراتىلعان. 12 جىلجىمالى مەديتسينالىق كەشەن اۋداندارعا جەتكىزىلۋدە. ناۋقاستاردى دەر كەزىندە انىقتاپ, قىزمەت كورسەتۋ ماقساتىندا ارنايى ۋچاسكەلەر مەن ءموبيلدى توپتار قۇرىلعان. ءو.شوكەەۆتىڭ توراعالىعىمەن وتكەن لەزدەمەلىك ماجىلىستە وسىنداي مالىمەتتەر كەلتىرىلدى.

ال وبلىستاعى پوليتسيا دەپارتامەنتى ءوڭىردىڭ باس سانيتارلىق دارىگەرىنىڭ قاتاڭ كارانتيندىك شەكتەۋ شارالارىن ەنگىزۋ قاۋلىسىنا سايكەس كۇشەيتىلگەن تۇردە جۇمىس اتقارۋدا. سونداي-اق وڭىردەگى بارلىق نىساندارداعى سانيتارلىق تالاپتىڭ ساقتالۋىن قوعامدىق باقىلاۋ مۇشەلەرىنەن قۇرىلعان ارنايى مونيتورينگتىك توپ باقىلايدى. رەيدتىك تەكسەرىسكە شىعىپ, باس سانيتار دارىگەردىڭ قاۋلىسىن ەلەمەگەندەرگە اكىمشىلىك شارا قولدانۋدا. مىسالى, 53 ءموبيلدى توپ كوروناۆيرۋستىڭ تارالۋىنا جول بەرمەۋ ماقساتىندا جۇرگىزىلگەن ارنايى رەيد كەزىندە كاسىپكەرلىك نىسانداردى ارالاپ, بەلگىلەنگەن سانيتارلىق نورمالاردىڭ ساقتالۋىن تەكسەردى. ناقتىراق ايتساق, 5 شىلدە مەن 10 قازان ارالىعىندا 30 مىڭعا جۋىق نىساندى ارالاعان ءموبيلدى توپ كارانتين تالاپتارىن بۇزعان 3 701 نىساندى انىقتادى. اكىمشىلىك قۇقىقبۇزۋشىلىق تۋرالى حاتتاما تولتىرىلىپ, 150 217 470 تەڭگە كولەمىندە ايىپپۇل سالىندى. توي-جيىنعا تىيىم سالىنعانىنا قاراماستان وڭىردە جەكەلەگەن ازاماتتار كەلىن ءتۇسىرىپ, قىز ۇزاتىپ, جيىن وتكىزۋدى توقتاتپاي تۇر. ءموبيلدى توپتىڭ تەكسەرۋىمەن جالپى 236 وتباسىلىق, مەرەكەلىك ءىس-شارا انىقتالىپ, توي ۋاقىتىنان بۇرىن توقتاتىلعان. بۇگىندە بارلىق اۋدانداردا ەكىنشى تولقىنعا دايىندىق شارالارى كۇشەيتىلىپ, جۇمىس باقىلاۋعا الىنعان.

مىسالى, 120 مىڭنان استام تۇرعىنى بار وردا­باسى اۋدانىندا وبلىستىق قوعامدىق دەنساۋ­لىق باسقارماسىنىڭ قولداۋىمەن 100 ورىندىق گوسپيتال سالىنۋدا. اۋدان اكىمى نۇربول تۇراش­بەكوۆ بۇرىنعى بوسانۋ, حيرۋرگيا, رەانيماتسيا بولىمشەلەرى ورنالاسقان عيماراتقا كۇردەلى جوندەۋ جۇمىستارى جۇرگىزىلىپ, پروۆيزورلىق ورىنعا اينال­دىرىلعانىن ايتادى. نىساننىڭ كارىز, ەلەكتر جەلىسى, سۋ قۇبىرلارى تۇگەلىمەن جاڭارتىلعان. جاقىن كۇندەرى كوگىلدىر وتىننىڭ دا ماسەلەسى شەشىلمەك. مۇندا 22 بوكستىق پالاتا بولادى. جانساقتاۋعا ارنالعان ەكى زال جاساقتالعان. جاڭا پروۆيزورلىق بولىمشەگە ورتالىقتاندىرىلعان 14 وتتەگى نۇكتەسى كىرگىزىلەدى. ودان بولەك اۋرۋحانانىڭ ۋاقىتشا يزولياتور, تەراپيا, جانساقتاۋ بولىمشەلەرىندە 64 وتتەگى نۇكتەلەرى ورنالاسقان. بۇعان دەيىن ەمدەۋ مەكەمەسىنە دەمەۋشىلەر جانە وبلىستىق باسقارما تاراپىنان 30 وتتەگى كونتسەنتراتورى بەرىلگەن. اۋرۋحاناعا قاراستى 11 دارىگەرلىك امبۋلاتوريانىڭ ارقايسىسىنا 2 دانادان, ەمدەلۋشىسى كوپ كەيبىر امبۋلاتورياعا 3 دانا وتتەگى كونتسەنتراتورىنان ۇلەستىرىلىپتى. ودان بولەك مەكەمەدە وكپەنى جاساندى جەلدەتۋگە ارنالعان 16 اپپارات بار. ورتالىق ىشىنەن 20 توسەكتىك وبسەرۆاتسيا دايىن. سونداي-اق اۋرۋحانا باسشىلىعى پروۆيزورلىق ورتالىق ىشىنەن بوساندىرۋ كابينەتىن دە جاساقتاپ قويىپتى. ودان بولەك اۋرۋحانادا 4 وپەراتسيا زالى بار. كەلگەن ناۋقاستاردىڭ دەنە قىزۋىن ولشەيتىن فيلتر بولمەسى دە جوندەۋدەن وتكىزىلگەن. مەكەمەنىڭ 2 ايعا جەتەتىن ءدارى-دارمەك قورى بار. باس­قارما تاراپىنان جانە گۋمانيتارلىق كومەك ارقى­لى كەلگەن پرەپاراتتاردىڭ بارلىعىن ارنايى قويمادا ساقتاۋدا. پاندەميا كەزىندە اۋرۋحانا كوروناۆيرۋس ينفەكتسياسىن انىقتاۋ ءۇشىن اناليزدەردى وبلىس ورتالىعىنا جىبەرىپ وتىرعان. ەندى ماماندار مۇنداي ابىگەرگە تۇسپەيدى. سەبەبى اۋرۋحاناعا كوروناۆيرۋس ينفەكتسياسىن انىقتايتىن اپپارات ورناتىلدى.

اۋدان حالقىنا مۇندا 8 رەانيماتولوگ, 3 ينفەكتسيو­نيست, 50-گە جۋىق جالپى تاجىريبەلى دارىگەر, 5 تە­را­پەۆت قىزمەت كورسەتۋدە. اتالعان مامانداردىڭ بار­لىعى كوروناۆيرۋس جۇقتىرعان ناۋقاستاردى ەمدەۋ­­گە ار­نالعان ەمدەۋ حاتتامالارىمەن تانىسىپ, ءتۇرلى كون­فەرەنتسيالارعا قاتىسىپ, تاجىريبە جيناقتاۋدا.

«پاندەميا كەزىندە كوپتەگەن ناۋقاستار اۋىر حالدە جەتكىزىلدى. اۋرۋدىڭ بۇلايشا باتپانداپ كىرۋىنە ولاردىڭ دەرت قىلاڭ بەرە باستاعان ساتتە دارىگەرگە قارالماي, ءوز بەتىنشە ءدارى-دارمەكتى قابىلداي بەرگەنى سەبەپ بولىپ وتىر. بۇل – ۇلكەن قاتەلىك. ويتكەنى بەيبەرەكەت قولدانىلعان پرەپاراتتار ۆيرۋستىڭ دەڭگەيىن باسىپ جىبەرەدى دە, اۋرۋدىڭ كلينيكالىق بەلگىلەرى بىلىنبەي قالادى. بۇل دارىگەرلەرگە دياگنوز قويۋعا, اۋرۋدىڭ دەڭگەيىن انىقتاۋعا ۇلكەن كەدەرگى كەلتىرەدى. انتيبيوتيكتەردى قابىلداي بەرگەسىن ءبىزدىڭ جاساعان ەم-دومىمىز اسەر ەتپەي قالادى. مىنە, وسىنداي ورەسكەل قاتەلىكتىڭ كەسىرىنەن قانشاما پاتسيەنت ءتيىستى دەڭگەيدە ەم-شارا قابىلداي المادى. ەندىگى كەزەكتە تۇرعىندار مۇنداي قاتەلىككە بوي الدىرماۋى كەرەك. ماماندار ءتۇسىندىرۋ جۇمىستارىن جۇرگىزگەن كەزدە حالىققا وسى جاعدايدى دا قايتا-قايتا ەسكەرتۋدە», دەيدى ورتالىق اۋرۋحانانىڭ باس دارىگەرى باقىتجان مىرزاگەلديەۆ.

تۇركىستان وبلىسى