كارانتين تالاپتارىن بۇزعان ەلوردالىق بيزنەس سۋبەكتىلەرى جابىلادى

پوليتسەيلەر, سەس وكىلدەرى جانە بايقوڭىر اۋدانى اكىمدىگىنىڭ قىزمەتكەرلەرى وتكەن تاۋلىكتە بىرقاتار نىسانداردى تەكسەردى. كاسىپورىندار مەن مەكەمەلەر ءالى دە بولسا تالاپتاردى ورىنداماعان.

بايقوڭىر اۋدانىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ مالىمەتىنشە, ءجيى تالاپ بۇزعان نىساندار اراسىندا بەلگىلەر مەن دەزينفەكتسيالىق كىلەمشەلەردىڭ بولماۋى, جۇمىس رەجيمىنىڭ ساقتالماۋى كوپ كەزدەسەدى.

اتاپ ايتقاندا, ت.حۋسەين كوشەسى, 11 مەكەنجايىنداعى كولىك جۋ ورنىنىڭ يەلەرى جۇمىس رەجيمىن بۇزعان, ساعات 22:45-تە مەكەمە اشىق بولعان.

كەنەسارى كوشەسى, 47 مەكەنجايىنداعى "مافيا" ويىن كلۋبىندا قورقور جۇمىس ىستەدى.

سونداي-اق, ءموبيلدى توپ "شانحاي" بازارىنان تالاپ بۇزۋشىلىقتاردى انىقتاعان. اتاپ ايتقاندا, كىرەبەرىستەگى دەزينفەكتسيالىق كىلەمشەلەر, بەلگىلەر مەن سانيتايزەرلەر بولماعان. تەرمومەتريا تەكسەرىلمەگەن.

باسقا اۋداندارداعى ءتارتىپ بۇزعان نىساندار: "يمپەريا" سپا سالونى (ىرعىز ك - ءسى, 23) "Sova" كاراوكە كلۋبى (كۇيشى دينا ك-ءسى, 24) "مادينا" دۇكەنى (بوراباي ك-ءسى, 10).

ء“ار اۋداندا ەكى ءموبيلدى توپ, بىرەۋى – كۇندىز, ەكىنشىسى – كەشكە جۇمىس ىستەيدى. قازىرگى تاڭدا كارانتين شارالارى كۇشەيتىلىپ جاتىر. سوندىقتان ءموبيلدى توپتار تەكسەرەتىن نەگىزگى ورىندار حالىق كوپ بولاتىن جەرلەر: بازارلار, قوعامدىق تاماقتانۋ ورىندارى, مەكتەپتەر, وندىرىستىك كاسىپورىندار. تەكسەرۋلەر بارىسىندا ءبىراز كەمشىلىكتەر انىقتالۋدا: جۇمىس گرافيگىنىڭ, ماسكا تاعۋ ءتارتىبى, الەۋمەتتىك قاشىقتىق ساقتالماۋى, كاسسالاردا ادامداردىڭ توپتالۋى كوپتەپ ورىن الۋدا. كوپ كاسىپورىنداردا سانيتايزەر ءىلىنىپ تۇرعانمەن, ونى حالىق قولدانبايدى. مۇنداي بۇزۋشىلىقتار انىقتالعان جاعدايدا اكىمشىلىك ايىپپۇل سالىنادى”, - دەيدى بايقوڭىر اۋدانى تاۋارلار مەن قىزمەتتەر ساپاسى مەن قاۋىپسىزدىگىن باقىلاۋ باسقارماسى باسشىسىنىڭ ورىنباسارى سالتانات يكلاسوۆا.

ەسكە سالا كەتەيىك, ەلوردادا 14 قازاننان باستاپ شوب جۇمىسىنا جاڭا شەكتەۋلەر ەنگىزىلدى. زاڭ بۇزعانى ءۇشىن ايىپپۇل سالىنادى. تۇرعىندارعا ماسكا تاعۋ رەجيمىن قاتاڭ ساقتاۋ, انتيسەپتيكتەردى قولدانۋ جانە قاشىقتىقتى ساقتاۋ قاجەت.