الماتى قالاسىنىڭ پوليتسيا قىزمەتكەرلەرى ارنايى مونيتورينگتىك توپتاردىڭ قۇرامىندا ءجۇرىپ, كارانتيندىك ستاندارتتاردىڭ ساقتالۋى بويىنشا تۇرعىندار اراسىندا ءتۇسىندىرۋ جۇمىستارىن كۇشەيتۋگە باعىتتالعان رەيدتىك ءىس-شارالاردى جالعاستىرۋدا, دەپ حابارلايدى Egemen.kz.
«بىرىنشىدەن, ءبىز بەتپەردە رەجيمىن ساقتاۋ تۋرالى ايتىپ وتىرمىز, ول بۇگىندە ازاماتتاردى جەكە قورعاۋدىڭ نەگىزگى ادىستەرىنىڭ ءبىرى بولىپ تابىلادى. تاجىريبە كورسەتكەندەي, كەيبىرەۋلەر كارانتيندى ساقتاۋدى مۇلدەم توقتاتقان: ولار مەديتسينالىق بەتپەردەلەرىن شەشىپ, قوناققا بارىپ ءجۇر, قولدارىن جانە ۇيلەرىن انتيسەپتيكپەن تازالاۋدى ۇمىتىپ كەتكەن. ال بۇل كوروناۆيرۋستىق ينفەكتسيانىڭ تارالۋىنا اسەر ەتەتىن تىكەلەي فاكتورلار, بۇل ينفەكتسيانىڭ قولايلى ورتاسى. وسىعان بايلانىستى ازاماتتاردىڭ جاپپاي دەمالۋ ورىندارىندا جانە قوعامدىق كولىكتەردە ءتۇسىندىرۋ جۇمىستارى كۇشەيتىلدى. پوليتسيا قىزمەتكەرلەرى, سەس جانە اۋدان اكىمدىكتەرىنەن قۇرىلعان ونداعان ءموبيلدى توپ ءوز جۇمىستارىن جالعاستىرۋدا», - دەيدى الماتى قالالىق پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى نۇرلان الماسبەكوۆ.
سونىمەن قاتار ءتارتىپ ساقشىلارى بەتپەردە رەجيمىن, الەۋمەتتىك اراقاشىقتىقتى جانە كارانتيندىك تالاپتاردى قاتاڭ ساقتاۋعا شاقىرادى.
«بۇل ءسىزدىڭ جانە جاقىندارىڭىزدىڭ دەنساۋلىعىنىڭ قاۋىپسىزدىگىنىڭ كەپىلى. اركىم قاۋىپتىڭ ءالى وتپەگەنىن جانە قورعانىس قۇرالى ينفەكتسيانىڭ تارالۋىن بارىنشا ازايتۋعا كومەكتەسەتىنىن ءتۇسىنۋى ماڭىزدى. پوليتسيا قىزمەتكەرلەرى ءتۇسىندىرۋ جۇمىستارىنا باعىتتالعان. قانداي دا ءبىر سەبەپتەرمەن بەتپەردە رەجيمىن ساقتامايتىن ازاماتتار ءۇشىن ينسپەكتورلار مەديتسينالىق بەتپەردە كيۋ كەرەكتىگىن ەسكە سالىپ, ونى ۇسىنادى. مۇنداي جۇمىس بارلىق جەردە جۇرگىزىلەدى», - دەيدى پولكوۆنيك الماسبەكوۆ.