قانت قىزىلشاسى بيىل قاپشاعاي وڭىرىندە 860 گەكتارعا سەبىلسە, وبلىستا ءتاتتى ءتۇبىر القابى 16,1 مىڭ گەكتارعا جەتكىزىلدى. جەتىسۋلىقتار بيىل 500 مىڭ توننا قىزىلشا جيناپ, 42 مىڭ توننا قانت ءوندىرۋدى جوسپارلانىپ وتىر, - دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.
قاپشاعايداعى «ەتەكباەۆ» شارۋا قوجالىعى 10 جىلدان بەرى جازدىق ارپا, كارتوپ جانە كوكونىستەر ەگۋمەن اينالىسادى. قوجالىق سوڭعى جىلدارى قانت قىزىلشاسىنا كوبىرەك كوڭىل بولە باستادى. بيىل دا 40 گەكتار جەرگە قىزىلشا ەگىپ, جاز بويى تىنباي ەڭبەك ەتىپ, توككەن ماڭداي تەردىڭ ارقاسىندا گەكتارىنان 700 تسەنتنەردەن مول ءونىم الىپ وتىر.
"مۇنداي جاقسى ناتيجەگە ۇكىمەت جانە جەرگىلىكتى بيلىك تاراپىنان كورسەتىلگەن قولداۋلارلاردىڭ ارقاسىندا جەتىپ وتىرمىز. دەر كەزىندە ەگىستىكتىڭ سۋعارىلعانى, تىڭايتقىشتارعا ارنالعان سۋبسيديالار بەرىلىپ وتىرعانىنىڭ ءوزى – بىزگە ۇلكەن كومەك. وتاندىق ءونىمدى قولداۋ ارقىلى قانتپەن ءوزىمىزدى-ءوزىمىز قامتي الاتىنداي دارەجەگە جەتۋگە مۇمكىندىگىمىز بار» - دەيدى «ەتەكباەۆ» شارۋا قوجىلىعىنىڭ باسشىسى نۇرلان ەتەكباەۆ.
ءدال وسىنداي ەگىستىكپەن شۇعىلداناتىن «باۋىر» شارۋا قوجالىعىنىڭ دا وسى جىلعى ءونىمى جامان ەمەس. بيىل 100 گەكتار جەرگە جازدىق ارپا, 10 گا سۇرلەمگە ارنالعان جۇگەرى, 10 گا جوڭىشقا جانە 23 گەكتار پياز وتىرعىزعان. جالپى ەگىستىك جەرى 143 گەكتاردى الىپ وتىر. شەڭگەلدى اۋماعىنداعى ءىرى قوجالىقتاردىڭ ءبىرى سانالاتىن بۇل قوجالىق پيازعا باسىمدىق بەرگەن. ءونىمنىڭ ءوتىمى جوعارى, سۇرانىسقا يە. ولار وسىرگەن پيازدى قازاقستاندا عانا ەمەس, رەسەيدە دە تۇتىنۋشىلار كوپ. ءدال قازىرگى تاڭدا شارۋالار ءونىمدى بۋىپ-ءتۇيىپ قويماعا قويۋ ءۇشىن ازىرلىك جۇمىستارىن جۇرگىزۋدە. قويماعا ازىرگە 600 تونناداي ءونىم جينالادى.
جالپى الماتى وبلىسىندا ەگىن ناۋقانى قارقىندى ءجۇرىپ جاتىر. بيىلعى جىلى وڭىردە ەگىستىك القابى 968,6 گەكتاردى قۇراعان. ءونىم شىعىمى جاقسى. كارتوپ, جەمىس-جيدەك, كوكونىس, باقشا ونىمدەرى, مال ازىعى, ءجۇزىم القاپتارىندا كۇزگى جيىن-تەرىن تولعىعىمەن اياقتالسا, داندىك جانە مايلى داقىلداردى جيناۋ جۇمىسى دا ەداۋىر ەڭسەرىلگەن. سونىڭ ىشىندە كارتوپتىڭ, جەمىس-جيدەكتىڭ, مايلى داقىلداردىڭ, داندىك جۇگەرىنىڭ ونىمدىلىگىندە بىلتىرعىعا قاراعاندا ءوسىم بار.