سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن «ار-نامىستى ارقالاعان رۋحتى باتىر باۋىرجان» تاقىرىبىندا كەزەكتى ونلاين ادالدىق ساعاتى ءوتتى, دەپ حابارلايدى Egemen.kz.
بيىل اتى اڭىزعا اينالعان كوماندير, كوپتەگەن ماراپاتتاردىڭ يەگەرى, جازۋشى جانە كەڭەس وداعىنىڭ باتىرى باۋىرجان مومىش ۇلىنىڭ تۋعانىنا 110 جىل تولدى.
باتىلدىق, ادالدىق جانە تاباندىلىق قاسيەتتەر باۋىرجان مومىش ۇلىن حالىق قاھارمانى ەتتى. ونىڭ تۇلعاسىنان جوعارى پاتريوتتىق رۋح, شەشىم قابىلداۋداعى سەنىمدىلىك, ءتارتىپ, دانالىق پەن پاراساتتىلىق قاسيەتتەرى دە تابىلادى.
ونلاين-ءدارىس بارىسىندا جاستار پولك كومانديرىنىڭ باتىرلىق ارەكەتتەرى مەن ومىرلىك قاعيدالارىن ەسكە ءتۇسىردى.
باتىردىڭ كوزقاراسىنشا, سەنىم قامالى – ادامدىق پەن ادالدىققا اپاراتىن ۇلى كۇش ىسپەتتەس. سەنىم بار جەردە ءۇمىت تە بار. بۇل تۋراسىندا ول بىلاي تۇجىرىم جاسايدى: «سەن – اتا-اناڭنىڭ ءۇمىتىسىڭ. سەن قايتالانباس تۇلعاسىڭ, ءوز ءومىرىڭنىڭ بەلسەندى جاساۋشىسىسىڭ, سوندىقتان وزىڭە عانا سەن».
وسىلايشا وسى ويى ارقىلى جاستاردىڭ بويىنداعى سەنىمنىڭ ماڭىزدىلىعىن, سونىمەن قاتار وزىنە ءارى اتا-اناسىنىڭ تاربيەسىنە بەرىك ادام ەشقاشان ارسىزدىققا بارمايتىندىعىن مەڭزەيدى.
ۇلتجاندىلىق پەن باتىردىڭ انا تىلگە دەگەن قۇرمەتى ەرەكشە نازار اۋدارتادى. ول: «انامىزدىڭ اق سۇتىمەن بويىمىزعا دارىعان ءتىلىمىزدى ۇمىتۋ-بۇكىل اتا-بابامىزدى ۇمىتۋ», – دەگەن.
باۋىرجان مومىش ۇلىنىڭ مۇراسى ەرلىك پەن تارتىپكە, پاتريوتيزمگە تولى, ءومىر جولى ار-نامىس, ادىلدىك جانە ادامگەرشىلىك قاعيدالارىنا نەگىزدەلگەن.
«ادالدىق ساعاتىنىڭ» ۇيىمداستىرۋشىلارى اتالعان قۇندىلىقتاردى جاستاردىڭ بويىنا ءسىڭىرۋ ارقىلى ادال ەڭبەك پەن رۋحاني ادامدىق قاسيەتتەر جوعارى باعالاناتىن, جەمقورلىقسىز پاراساتتى قوعام قۇرۋعا بولادى دەپ سەنىم بىلدىرەدى.
اقپارات جانە قوعامدىق دامۋ مينيسترلىگىنىڭ قولداۋىمەن بەينە-ساباق رەسپۋبليكالىق جانە وڭىرلىك تەلەارنالار ەفيرىندە كورسەتىلىپ, سونداي-اق اگەنتتىكتىڭ Youtube-ارناسىندا جانە الەۋمەتتىك جەلىلەردە ورنالاستىرىلدى.