وسى جىلدىڭ 8 ايىندا الەۋمەتتىك مەديتسينالىق ساقتاندىرۋ قورى ءمامس پاكەتىندەگى مەديتسينالىق كومەكتى تولەۋگە 163,6 ملرد تەڭگە جىبەردى, دەپ حابارلادى امسق ءباسپاسوز قىزمەتى.
وسى جىلدىڭ 8 ايىندا ءمامس-عا 351,2 ملرد تەڭگە جارنالار مەن اۋدارىمدار ءتۇستى. بۇل رەتتە مەملەكەت مەديتسينالىق ساقتاندىرۋ جۇيەسىنە نەگىزگى تولەۋشى بولىپ قالا بەرەدى. ول 15 جەڭىلدىك ساناتى ءۇشىن جارنا تولەيدى. مەملەكەتتىڭ جارنالارى 197,2 ملرد تەڭگەنى, جۇمىس بەرۋشىلەردىڭ اۋدارىمدارى – 100,9 ملرد تەڭگەنى قۇرادى. ونىڭ ىشىندە 50,8 ملرد تەڭگەنى قىزمەتكەرلەر, جەكە كاسىپكەرلەر, جەكە پراكتيكامەن اينالىساتىن ادامدار, ءوز-وزىنە تولەۋشىلەر جارنالارى, 2,3 ملرد تەڭگەنى بىرىڭعاي جيناقتاۋشى زەينەتاقى جارنالارى قۇرادى.
ءمامس ءۇشىن جارنالار مەن اۋدارىمدار ۇلتتىق بانكتەگى ارنايى شوتقا تۇسەتىنىن, سودان كەيىن قاراجات ءمامس پاكەتى بويىنشا كورسەتىلگەن مەديتسينالىق قىزمەتتەردى تولەۋگە قوردىڭ جەتكىزۋشى مەديتسينالىق ۇيىمدارىنا جىبەرىلەتىنىن اتاپ وتەمىز.
«قازىرگى ۋاقىتتا ەلىمىزدە ەمحانالارعا تىركەلۋ ناۋقانى ءجۇرىپ جاتىر. بەكىتۋ ناۋقانىنىڭ قورىتىندىسى بويىنشا مەديتسينالىق ۇيىمدار بولىنىسىندە حالىقتىڭ ءبولىنۋىن ەسكەرە وتىرىپ, 2021 جىلعا قارجىلاندىرۋ جوسپارلاناتىن بولادى. قور بارلىق قازاقستاندىقتاردى ەسكەرە وتىرىپ, دەرەكقوردىڭ ءابسوليۋتتى دۇرىستىعىنا مۇددەلى. ويتكەنى ءاربىر تىركەلگەن تۇرعىن ءۇشىن اي سايىن مەديتسينالىق ۇيىمدارعا جان باسىنا قارجىلاندىرۋ تولەنەدى», دەپ ەسكە سالدى قور وكىلدەرى.
قاڭتار-تامىز ارالىعىندا شىعىنداردىڭ باسىم بولىگى ستاتسيونارلىق مەديتسينالىق كومەك تولەمى – 62 ملرد تەڭگەدەن استام جانە اۋىلداعى ستاتسيونارلار قىزمەتى ءۇشىن 14,6 ملرد تەڭگەنى قۇرادى. 8 ايدا جوسپارلى تۇردە ەلىمىزدىڭ ستاتسيونارلارىندا 660 مىڭنان استام ادام ەم قابىلدادى.
كونسۋلتاتسيالىق-دياگنوستيكالىق كومەك كورسەتكەنى ءۇشىن مەديتسينالىق ۇيىمدارعا 54 ملرد تەڭگە تولەندى. ايتا كەتۋ كەرەك, كت جانە مرت قىزمەتتەرى ازاماتتار ءۇشىن بۇرىنعىسىنشا وزەكتى بولىپ قالۋدا. 8 ايدا پاتسيەنتتەرگە كت جانە مرت 400 مىڭنان استام قىزمەت كورسەتىلدى.
قور حالىققا جوعارى تەحنولوگيالىق قىزمەت كورسەتكەنى ءۇشىن 14 ملرد تەڭگەدەن استام قارجى تولەدى. مۇنداي قىزمەتتەردى 4,5 مىڭنان استام ادام الدى. 13 ملرد تەڭگە ستاتسيوناردى الماستىراتىن كومەكتى تولەۋگە باعىتتالدى.
بيىلعى 8 ايدا الەۋمەتتىك مەديتسينالىق ساقتاندىرۋ قورى حالىققا 2,8 ملن-نان استام ستوماتولوگيالىق قىزمەت كورسەتكەنى ءۇشىن 5,1 ملرد تەڭگە تولەدى. سونىمەن قاتار 67 مىڭعا جۋىق قازاقستاندىق جەدەل جاعدايدان (ينفاركت, ينسۋلت جانە ت.ب.) جانە وپەراتسيالىق ارالاسۋدان كەيىنگى مەديتسينالىق وڭالتۋ الدى.
ەسكە سالا كەتەيىك, ەكىنشى توقساندا كارانتين اياسىندا جوسپارلى تۇردە مەديتسينالىق كومەك كورسەتۋگە شەكتەۋ قويىلدى. 1 تامىزدان باستاپ ەلىمىزدىڭ كلينيكالارىندا جوسپارلى مەديتسينالىق كومەك قايتا باستالدى.سوندىقتان تامىز-قىركۇيەك ايلارىندا ءمامس پاكەتىندە حالىقتىڭ مەديتسينالىق قىزمەتتەردى تۇتىنۋىنىڭ ءوسۋى بايقالادى.