تەكسەرۋ ناتيجەلەرى قارالدى

ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆتىڭ توراعالىعىمەن وتكەن ءىس-شاراعا تۇركىستان وبلىسى اكىمىنىڭ ورىنباسارى ۇلان تاجىباەۆ, ادام قۇقىقتارى جونىندەگى ۋاكىل ەلۆيرا ءازىموۆا, بەيىندى مەملەكەتتىك جانە جەرگىلىكتى اتقارۋشى ورگان­داردىڭ قىزمەتكەرلەرى, ۇكىمەتتىك ەمەس ۇيىم­دار­دىڭ وكىلدەرى قاتىستى.

بۇعان دەيىن قوعام بەلسەندىسى اقمارال ءومىرالينوۆا (مادەلحانوۆا) الەۋمەتتىك جەلى­لەر­دە كورسەتىلەتىن قىزمەتتى الۋشىلار مەن ورتالىق قىزمەتكەرلەرىنىڭ قۇقىقتارىنىڭ بۇزىلۋى تۋرالى ايتقان بولاتىن. تەكسەرۋ جۇر­گى­زۋ ءۇشىن مونيتورينگتىك توپ قۇرىلدى, ونىڭ قۇ­رامىنا قۇزىرەتتى ورتالىق مەملەكەتتىك جانە جەرگىلىكتى اتقارۋشى ورگانداردىڭ ماماندارى, سونداي-اق اقمارال ءومىرالينوۆا كىردى.

وتىرىس بارىسىندا ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىن­باسارى اسقار ايماعامبەتوۆ تەكسەرۋ نا­تيجەلەرى قىزمەتكەرلەردىڭ ەڭبەك قاتى­ناس­تا­رى مەن جۇمىس رەجىمىنىڭ بۇزىلۋ فاكتى­لە­رىن كورسەتكەنىن حابارلادى. سونداي-اق مەدي­تسي­نا­لىق قىزمەت كورسەتۋ, سانيتارلىق نورمالار­دى ساقتاماۋ, قىزمەت الۋشىلاردى دەنە ەڭبەگىنە تارتۋ بولىگىندە بۇزۋشىلىقتارعا جول بەرىلگەن. بۇدان باسقا, ماتەريالدىق-تەحنيكالىق بازا­نىڭ ءالسىز جاراقتاندىرىلۋى, كەيبىر ساتىپ الىنعان تاۋارلاردىڭ ء(سۇت ونىمدەرى, جۇمساق قۇرال-سايمان جانە كيىم-كەشەك تەحنيكالىق ەرەكشەلىككە سايكەس كەلمەدى) سايكەسسىزدىگى انىق­تال­دى, سونداي-اق كەيبىر تاۋارلارعا سايكەستىك سەرتيفيكاتتارى بولعان جوق.

وتىرىس بارىسىندا كوكسايەك ورتالىعىنىڭ ديرەكتورى ءيمانالى امانگەلديەۆ ورتالىقتىڭ قىزمەتىن جاقسارتۋ بويىنشا ازىرلەنگەن جانە بەكىتىلگەن قىسقا مەرزىمدى جانە ۇزاق مەرزىمدى جوسپارلار نەگىزىندە ماتەريالدىق-تەحنيكالىق بازاعا تولىق تۇگەندەۋ جۇرگىزىلگەنىن جانە ساپالى قىزمەت كورسەتۋ ءۇشىن قاجەتتى نەگىزگى قۇرالداردى ساتىپ الۋعا بيۋدجەتتىك وتىنىمدەر جاسالعانىن حابارلادى. وعان عيمارات پەن جابدىقتى جوندەۋ, ينتەرنەت بايلانىسىن جاقسارتۋ, بەينەباقىلاۋ جۇيەسىن جاڭارتۋ كىرەدى. ورتالىق جانىنان قوعامدىق باقىلاۋ كەڭەسى قۇرىلدى, بۇل ورتالىق قىزمەتىنىڭ اشىقتىعى مەن ايقىندىعىن قامتاماسىز ەتۋ, كورسەتىلەتىن قىزمەتتى الۋشىلاردىڭ زاڭدى قۇقىقتارىن ساقتاۋ جونىندەگى جۇمىسقا بەلسەندى تۇردە كىرىستى.

تۇركىستان وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىرباەۆا وڭىردە ارنايى الەۋمەتتىك قىزمەتتەر ۇسىناتىن ۇيىمدار جەلىسىن كەڭەيتۋ بويىنشا قابىلدانىپ جاتقان شارالار تۋرالى ايتىپ بەردى. ماسەلەن, تۇركىستان وبلىسىنىڭ قۇرىلۋىنا جانە بىرنەشە مەديتسينالىق-الەۋمەتتىك مەكەمەلەردىڭ 2018 جىلى شىمكەنت قالاسىنىڭ بالانسىنا بەرىلۋىنە بايلانىستى تۇركىستان وبلىسىن دامىتۋدىڭ 2024 جىلعا دەيىنگى كەشەندى جوس­پا­رىن ىسكە اسىرۋ شەڭبەرىندە تۇركىستان, ارىس جانە كەنتاۋ قالالارىندا, سونداي-اق كەلەس جانە تۇلكىباس اۋداندارىندا سىيىمدىلىعى از ارناۋلى الەۋمەتتىك قىزمەتتەر كورسەتۋ ورتالىقتارىن سالۋ كوزدەلگەن.

كەنتاۋ قالاسىندا 200 ورىندىق مۇگەدەكتەردى وڭالتۋ ورتالىعىنىڭ قۇرىلىسىنا مەملەكەتتىك ساراپتامانىڭ قورىتىندىسى الىندى, 50 ورىندىق 6 الەۋمەتتىك نىساننىڭ قۇرىلىسى بويىنشا جوبالىق-سمەتالىق قۇجاتتاما مەملەكەتتىك ساراپتامانىڭ قاراۋىندا جاتىر. بۇل نىسانداردىڭ قۇرىلىسى مەملەكەتتىك قاراجات ەسەبىنەن دە, بيزنەستىڭ الەۋمەتتىك جاۋاپكەرشىلىگى اياسىنداعى دەمەۋشىلىك قاراجات ەسەبىنەن دە جوسپارلانىپ وتىر. ماسەلەن, 2020 جىلدىڭ 4 ماۋسىمىندا وبلىس اكىمدىگى, «سىمبات-ءاى» جشس جانە كەلەس, تۇلكىباس اۋداندارى مەن كەنتاۋ قالاسىنىڭ اكىمدىكتەرى اراسىندا قايىرىمدىلىق كومەك رەتىندە ينۆەستوردىڭ ءوز قاراجاتى ەسەبىنەن بيزنەستىڭ الەۋمەتتىك جاۋاپكەرشىلىگى شەڭبەرىندە قۇرىلىس جۇرگىزۋ تۋرالى ءوزارا ىنتىماقتاستىق تۋرالى ءۇش جاقتى مەموراندۋمدارعا قول قويىلدى. ءۇش نىسان قۇرىلىسىنىڭ جالپى قۇنى بولجام بويىنشا 6,9 ملرد تەڭگەنى قۇرايدى. قۇرىلىستى اياقتاۋ جانە 3 نىساندى پايدالانۋعا بەرۋ 2021 جىلدىڭ كوكتەمىنە جوسپارلانعان.

ۆەدومستۆوارالىق كەڭەستىڭ قاتىسۋ­شى­لارىنا تىڭداۋ ناتيجەلەرى بويىنشا جۇ­مىس ىستەپ تۇرعان ءمام-ءدى ۇلكەيتۋ, شاعىن جي­ناقتالعان الەۋمەتتىك مەكەمەلەر سالۋ جانە ۇكىمەتتىك ەمەس ۇيىمدار ارقىلى ارناۋ­لى الەۋمەتتىك قىزمەتتەر كورسەتۋگە مەملە­كەت­تىك الەۋ­مەتتىك تاپسىرىس شەڭبەرىندە قار­جى­لان­دى­رۋ كولەمىن ۇلعايتۋ ماسەلەسىن قاراۋ بويىنشا ۇسى­نىمدار بەرىلدى.

تۇركىستان وبلىسى