الا جازداي تابيعات اياسىندا, كول جاعاسىندا دەمالا بىلگەنىمىزبەن, سوڭىمىزدا قالعان قوقىستى جيناستىرۋدى ۇمىتىپ كەتىپ جاتامىز. ۇمىتقاندىق پا, الدە مادەنيەتسىزدىك پە؟ تاربيەنىڭ دە جوقتىعى شىعار. ال شاشىلعان پوليەتيلەن بوتەلكە, قاپشىقتار جۇزدەگەن جىلدار بويى شىرىمەيتىنىن بىلەتىن شىعارسىز.
تابيعات انانى اياۋسىز لاستاعانىمىزبەن قويماي, قوقىستىڭ شاشىلىپ جاتقانىن ايتىپ, باسشىلىق تاراپتى كىنالايتىنىمىز تاعى بار. ءبىر جاعىنان قوقىس كونتەينەرىن قويماعاندىقتان كىنالى دە شىعار, الايدا جاپونياداعىداي اركىم ءوز قوقىسىن ءوزى الىپ كەتسە ەشقانداي ماسەلە تۋىندامايتىن ەدى. ءيا, بارشامىزعا الدىمەن جوعارى دەڭگەيدەگى مادەنيەت پەن سانا كەرەك.
مەملەكەت باسشىسى قاسىم-جومارت توقاەۆ قازاقستان حالىقىنا جولداۋىندا «مەكتەپتەر مەن جوعارى وقۋ ورىندارىندا وسكەلەڭ ۇرپاققا ەكولوگيالىق تاربيە بەرۋ ىسىنە جەتكىلىكتى نازار اۋدارۋ قاجەت. قوعامدا ەكولوگيالىق قۇندىلىقتاردى ورنىقتىرۋعا ۇندەيتىن «Birge taza Qazaqstan» ەكولوگيالىق اكتسياسىن جۇيەلى تۇردە وتكىزىپ تۇرعان ءجون» دەگەن بولاتىن.
جۋىقتا عانا ەكولوگيالىق قاۋىپسىزدىك ورتالىعىنىڭ وكىلدەرى, وبلىستىق قوعامدىق كەڭەستىڭ ساراپتامالىق جۇمىس توپتارى, ەرىكتىلەر قوزعالىسىنىڭ مۇشەلەرى دۇبىعالى كولىنىڭ جاعاسىن قوقىستان تازارتتى. جازداي شاشىلعان قالدىقتاردى قاپقا قاپتاپ, ءتيىستى ورىنعا جەتكىزدى. ەرىكتىلەر ءبىر كۇندە 200 قاپتاي قوقىس شىعارعان ەكەن. تازالانباعانى قانشاما؟!
تابيعات جاناشىرلارى قولداۋ بىلدىرگەن اكتسيانىڭ باستى ماقساتى – تابيعاتقا دەگەن ادامزاتتىڭ ماحابباتىن وياتۋ, قورشاعان ورتانى, وزەن-كولدەردى لاستاماۋعا ۇندەۋ ەدى. راس, دوڭگەلەنگەن دۇنيە بۇگىنمەن توقتاپ قالمايدى. كەلە جاتقان كەلەشەك ۇرپاق بار. بۇگىن شاشىلعان قوقىستان ەرتەڭ سولار زيان شەگىپ جاتپاسىنا كىم كەپىل؟!
– بىرىنشىدەن, تابيعاتقا وبال. ەكىنشىدەن, ادامداردىڭ سانا-سەزىمىنە تاڭعالامىن. ولار بيىل كەلىپ دەمالسا, كەلەسى جىلى تاعى كەلەدى. ارقايسىسىنىڭ استىندا ءبىر-ءبىر كولىك. سوندا قاپتارىن الا كەلىپ, قوقىستارىن سالىپ الا كەتۋ قيىن با؟! جاعالاۋدىڭ تاپ-تازا بولىپ تۇرعانى وزدەرىنە جاقسى ەمەس پە؟! ال ولار ەرتەڭىن ويلامايدى, – دەيدى اكتسياعا قاتىسۋشى دميتري كورەشكوۆ.
سونداي-اق تازالىق اكتسياسىن ۇيىمداستىرۋشىلاردىڭ پىكىرىنشە, زاڭدى تۇردە ءار ۇجىم, ستۋدەنتتەر مەن مەكتەپ وقۋشىلارى جىلىنا ءبىر رەت بەلگىلەنگەن ورىنداردى تازالاپ وتىرسا قورشاعان ورتا مۇنشالىقتى لاستانباس ەدى. ال ولار ءوز قولدارىمەن تازالاعان جەرگە ەكىنشى رەت قوقىس تاستاي قويمايدى. سونىمەن قاتار جاعالاۋدى لاستاعان ازاماتتارعا ايىپپۇل مولشەرىن كوبەيتىپ, قاداعالاۋدى كۇشەيتۋ كەرەك دەسەدى.
ەندى ويلاپ قارايىق, ءبىر كۇندە جاعالاۋدان 200 قاپتاي قوقىس شىعارىلدى. ال كول تۇبىنە قانشا قالدىق كەتكەنى بىزگە بەلگىسىز.
شىعىس قازاقستان وبلىسى