الماتىدا كارانتيندىك شارالار كۇشەيدى

الماتى قالاسىندا اۋەجاي مەن قوعامدىق ورىنداردا باقىلاۋ تالاپتارى كۇشەيىپ, تۇرعىندارعا قاۋىپسىزدىك شارالارىن قاتاڭ ساقتاۋعا كەڭەس بەرىلدى.

"كوروناۆيرۋس ينفەكتسياسىنىڭ جۇقتىرۋ كوزى ونىڭ سىرتتان كەلەتىنىن جانە ونىڭ قالا ىشىندە تارالاتىنىن ەسكەرە وتىرىپ, الماتى قالاسىنىڭ اكىمدىگى كورسەتىلگەن باعىتتاردىڭ ارقايسىسى بويىنشا كەشەندى شارالار قابىلداپ جاتىر. كوروناۆيرۋس ينفەكتسياسىنىڭ تارالۋىن بولدىرماۋ ءۇشىن الماتى حالىقارالىق اۋەجايىندا تۇراقتى تۇردە ەلىمىزگە شەتەلدەن كەلەتىن ازاماتتارعا تۇراقتى تۇردە مونيتورينگ جۇرگىزىلەدى. ماقسات – ۇشىپ كەلگەندەر اراسىندا كوروناۆيرۋس ينفەكتسياسىن انىقتاۋعا ارنالعان تەستتەن وتكەنى تۋرالى انىقتاماسى جوق ازاماتتاردى انىقتاۋ جانە سايكەس دياگنوستيكانى جۇرگىزۋ ءۇشىن جەدەل وقشاۋلاۋ", دەيدى دەپارتامەنت وكىلى.

بۇدان بولەك, اۋرۋ جۇقتىرۋدى بولدىرماۋ, قالا اۋماعىندا كارانتين شارالارىنىڭ بۇزىلۋ فاكتىلەرىن انىقتاۋ جانە قاۋىپسىزدىكتىڭ سانيتارلىق-ەپيدەميالىق تالاپتارىن ودان ءارى ورىندالۋىن قامتاماسىز ەتۋ ماقساتىندا 26 مونيتورينگتىك توپ قىزمەت ەتىپ جاتىر.

12-13 قازان ارالىعىندا كارانتين تالاپتارىنىڭ ساقتالۋى بويىنشا 243 تەكسەرۋ شارالارى جۇرگىزىلىپ, 27 نىساندا ءتارتىپ بۇزۋشىلىق انىقتالعان. ال بەتپەردە رەجىمىن بۇزعانى ءۇشىن قر اكىمشىلىك قۇقىق بۇزۋشىلىق كودەكسىنىڭ 425-بابىنىڭ 1-تارماعى بويىنشا 5 جەكە تۇلعا اكىمشىلىك جاۋاپكەرشىلىككە تارتىلدى.

سونىمەن قاتار, الماتى قالاسىنىڭ باس مەملەكەتتىك سانيتار دارىگەرىنىڭ 15.08.2020 جىلعى № 56 قاۋلىسىنداعى تالاپتاردى بۇزعان نىساندار انىقتالدى.

"سونىڭ ىشىندە ماقاتاەۆ كوشەسى, 53 مەكەنجايىنداعى (مەدەۋ اۋدانى) "شانس" بينگو كلۋبى, روزىباكيەۆ كوشەسى, 49 مەكەنجايىنداعى (بوستاندىق اۋدانى) "سانسابيل" ءدامحاناسى, بوكەيحانوۆ كوشەسى, 44 ا مەكەنجايىنداعى "King Beer Halal Burgers" ءدامحاناسى, فەدوروۆ كوشەسى, 24 مەكەنجايىنداعى (جەتىسۋ اۋدانى) "لۋنا" ءدامحاناسى, 6 شاعىن اۋدانداعى 3ب ءۇي مەكەنجايىنداعى "دۋەل" كومپتەرلىك كلۋبى, 6 شاعىن اۋدانداعى 11 ءۇي مەكەنجايىنداعى (اۋەزوۆ اۋدانى) "مونستر" كومپيۋتەرلىك كلۋبى بار", دەيدى اسەل قالىقوۆا.