قاراعاندى وبلىسىنداعى "ساران" شاحتاسىندا جاڭادان سالىنعان تازارتۋ ستانساسى ىسكە قوسىلدى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
بۇل قادامنىڭ وسى وڭىردەگى ەكولوگيالىق احۋالعا وڭ اسەرىن تيگىزەرى ءسوزسىز. مىسالى, وسى ماڭنان اعىپ وتەتىن سوقىر وزەنىنىڭ جاي-كۇيى وڭالاتىن بولدى دەپ سانايدى ەكولوگ-ماماندار.
جاڭا ستانسانىڭ قۋاتى تاۋلىگىنە 700 تەكشە مەترگە دەيىن سۋ تازالاۋعا جەتەدى. كوپساتىلى تازارتۋ تەحنولوگياسىنىڭ ارقاسىندا زالالسىزداندىرىلعان تازا سۋ الۋعا دا بولادى. تولىعىمەن اۆتوماتتاندىرىلعان جۇيەنى بىرنەشە ادام باسقارادى.
"ارسەلورميتتال تەمىرتاۋ" اق كومىر دەپارتامەنتىنىڭ باس ەكولوگى اسەل كارىموۆا "ساران" شاحتاسىنداعى ەسكى تازارتۋ جۇيەسىنىڭ 1973 جىلدان بەرى قولدانىلىپ كەلگەنىن ايتتى.
– سول ۋاقىتتان بەرى ەكولوگيالىق ستاندارتتار وزگەردى جانە ونىڭ تالاپتارى الدەقايدا قاتاڭدانا ءتۇستى. تەحنولوگيا قارىشتاپ العا كەتتى. جاڭا بۋىننىڭ زاماناۋي تازارتۋ عيماراتىن سالۋ تۋرالى شەشىم قابىلدانعان ەدى. ەندى بۇل ماقساتقا دا قول جەتتى, دەيدى ول قۋانىشىن جاسىرماي.
ءدال وسىنداي زاماناۋي تازارتۋ ستانساسى كەلەسى كەزەكتە "ارسەلورميتتال تەمىرتاۋ" اق-نىڭ يەلەگىندەگى "تەنتەك" شاحتاسىنا دا سالىناتىن بولادى.