100 مىڭنان استام مۇقتاج وتباسىعا "Birgemiz" قورىنان كومەك بەرىلەدى. وسى ماقساتقا قوردان 5 ملرد تەڭگەگە جۋىق قارجى ءبولىنىپ, بىرجولعى ماتەريالدىق كومەككە باعىتتالادى. ەلباسىنىڭ تاپسىرماسى بويىنشا نۇرسۇلتان نازارباەۆ قورىنىڭ قولداۋىمەن قاراجات قوردىڭ شوتىنا ءتۇستى, دەپ حابارلايدى Egemen.kz.
كەشە نۇرسۇلتان نازارباەۆ بۇكىل ەل بويىنشا تاعى 100 مىڭ الەۋمەتتىك از قامتىلعان وتباسىعا 50 مىڭ تەڭگە كولەمىندە قوسىمشا اتاۋلى تولەمدەر ۇيىمداستىرۋدى تاپسىرعان بولاتىن.
"Birgemiz" قورىنىڭ توراعاسى رۋسلان ساكەەۆتىڭ ايتۋىنشا, 100 مىڭنان استام ازامات بىرجولعى ماتەريالدىق كومەكپەن قامتىلادى. كومەك قاراجاتتى الۋشىلاردىڭ 7 ساناتى بەكىتىلگەن. ولاردىڭ قاتارىندا تۇرمىسى تومەن كوپبالالى وتباسىلار, مۇقتاج مۇگەدەكتەر, مۇگەدەك بالانى تاربيەلەپ وتىرعان وتباسىلار, ەڭ تومەنگى زەينەتاقى الاتىن جانە حالىقتىڭ الەۋمەتتىك ءالسىز توبىنا جاتاتىن زەينەتكەرلەر, جەتىم بالالار (تۇل جەتىم بالالار مەن اسىراۋشىسىنىڭ بىرىنەن ايرىلعان بالالار), ۇلى وتان سوعىسىنا قاتىسۋشىلارى مەن مۇگەدەكتەر جانە سولارعا تەڭەستىرىلگەندەر, تىل ەڭبەككەرلەرى بار.
"كومەك الۋشىلاردىڭ ءتىزىمىن بۇرىنعىداي اكىمدەر ۇسىنادى. بۇل رەتتە ءبىز بۇرىن كومەك كورسەتىلمەگەن ازاماتتاردىڭ الۋىن قاداعالايمىز", - دەدى قور توراعاسى.
سونداي-اق ر.ساكەەۆ قازىرگى تاڭدا وسى باعىتتا وڭىرلەرمەن قارقىندى جۇمىس جۇرگىزىلىپ جاتقانىن جانە ازاماتتارعا بىرجولعى كومەك جاقىن كۇندەرى بەرىلەتىنىن اتاپ ءوتتى.
ەستەرىڭىزگە سالا كەتەيىك, "Birgemiz" قورى وسى جىلدىڭ ناۋرىز ايىندا تۇڭعىش پرەزيدەنت, "Nur Otan" پارتياسىنىڭ ليدەرى نۇرسۇلتان نازارباەۆتىڭ باستاماسىمەن كوروناۆيرۋسپەن كۇرەس جاعدايىندا حالىقتىڭ الەۋمەتتىك وسال توپتارىن قولداۋ ءۇشىن قۇرىلعان بولاتىن. وسى ۋاقىت ىشىندە قور قاراجاتىنان 550 مىڭنان استام مۇقتاج ازامات 50 مىڭ تەڭگەدەن الدى. پاندەميامەن كۇرەستە الدىڭعى شەپتە بولعان ەلوردا مەن الماتى قالاسىنىڭ 2112 مەديتسينا قىزمەتكەرىنە بىرجولعى تولەم جاسالدى. پاندەميا باستالعان كەزەڭدە نۇر-سۇلتان, الماتى جانە شىمكەنت قالالارىنداعى الەۋمەتتىك ءالسىز 100 مىڭ وتباسىعا 5 ملن. ماسكا تاراتىلدى.
سونىمەن قاتار, قور ەسەبىنەن تۇركىستان وبلىسىنىڭ ماقتاارال اۋدانىنداعى مىرزاكەنت اۋىلىندا 20 ءۇيدىڭ قۇرىلىسى اياقتالدى. قازىرگى ۋاقىتتا 12 ءۇيدىڭ قۇرىلىسى جالعاسۋدا