الەمگە تانىمال ءانشى, وتانداسىمىز ديماش قۇدايبەرگەن ءوزىنىڭ Instagram پاراقشاسىندا "قىتاي داۋىسى" جوباسىنداعى قازاق قىزىنىڭ ونەرىنە ءتانتى بولىپ, ساتتىلىك تىلەدى, دەپ حابارلايدى Egemen.kz
ءمادينا دۋمان "قىتاي داۋىسى" جوباسىندا ديماش قۇدايبەرگەننىڭ "ۇمىتىلماس كۇن" ءانىن ايتقان ەدى.
"بۇگىن ءبىزدىڭ قارىنداسىمىز ءمادينا دۋماننىڭ ادەمى داۋىسىن ەستىدىم. "قىتاي داۋىسى" جوباسىنىڭ تالىمگەرى لي تسزيان مىرزاعا مەنىڭ ءانىمدى تاڭداعانى ءۇشىن العىس ايتقىم كەلەدى. I am singer جوباسىندا اۋىرىپ قالعانىم ەسىڭىزدە شىعار, ماەسترو لي. جوباعا قاتىسۋشى رەتىندە ءسىز ماعان سيرەك كەزدەسەتىن ءدارى-دارمەكتەردى اكەلىپ, مەنىڭ تەزىرەك جازىلۋىمدى قالاپ ەدىڭىز", دەيدى ديماش.
سونداي-اق ديماش ماديناعا الداعى جارىستاردا ساتتىلىك تىلەپ, جۇرەكجاردى لەبىزىن جەتكىزدى.
"ماديناعا مەنىڭ ءانىمدى تامىلجىتا ورىنداعانى ءۇشىن شىن جۇرەكتەن العىس ايتقىم كەلەدى. بۇل ءاندى قالاعان جەردە ايتىڭىز. مۇنداي ءاندى سەن سياقتى كەرەمەت ءانشىنىڭ ورىنداۋى مەن ءۇشىن ۇلكەن باقىت. ماديناعا ساتتىلىك تىلەيمىن. سەنىڭ اتاقتى بولاتىندىعىڭا سەنەمىن", دەيدى ول.