قوڭىراتبەك قۇرمانباەۆ اتىنداعى اقمولا وبلىستىق فتيزيوپۋلمونولوگيا ورتالىعىندا «COVID-19 پاندەمياسى: تۋبەركۋلەزگە قارسى ءىس-شارالاردى ۇيىمداستىرۋدىڭ زاماناۋي تاسىلدەرى جانە ەپيدەميالىق احۋالدىڭ جاڭا سىن-قاتەرلەرىنە دايىندىق» تاقىرىبىندا III عىلىمي-تاجىريبەلىك كونفەرەنتسيا ءوتتى.
اتالعان ءىس-شاراعا ەلىمىزدەگى جانە شەتەلدەردەگى تۋبەركۋلەزگە قارسى ۇيىمداردىڭ, مەملەكەتتىك ورگانداردىڭ باسشىلارى, مەديتسينا سالاسىنىڭ عالىمدارى قاتىستى. الدىمەن جامان تۇماۋ جايلاعان كەزەڭنىڭ جاي-جاپسارى قامتىلعان جيناقتىڭ تۇساۋكەسەرى ءوتتى. بۇدان ءارى وبلىستىق فتيزيوپۋلمونولوگيا ورتالىعى مەن كوپسالالى وبلىستىق اۋرۋحانادا تۋبەركۋلەزگە, ونكولوگيالىق پاتولوگياعا جانە باسقا دا سىرقاتتارعا قاجەتتى حيرۋرگيالىق كومەك كورسەتۋ بويىنشا رەسپۋبليكانىڭ تانىمال حيرۋرگتەرىنىڭ قاتىسۋىمەن شەبەرلىك ساباعى ۇيىمداستىرىلدى.
COVID-19 پاندەمياسىنىڭ العاشقى تولقىنىنان قورىتىندى شىعارىپ, وتكەنگە كوز جۇگىرتەتىن, مەديتسينالىق كومەكتى جاقسارتۋدىڭ قوسىمشا شارالارىن انىقتايتىن ۋاقىت كەلدى. پاندەميا كۇشەيگەن كەزەڭدە تۋبەركۋلەزگە قارسى كومەك, سونىمەن قاتار ەپيدەميالىق جاعدايدىڭ كەز كەلگەن قيىندىقتارى تۋىنداۋى ابدەن مۇمكىن.
كونفەرەنتسيا بارىسىندا ۇلتتىق فتيزيوپۋلمونولوگيا عىلىمي ورتالىعىنىڭ ديرەكتورى, مەديتسينا عىلىمدارىنىڭ دوكتورى مالىك ادەنوۆ ەلىمىزدەگى جاعداي تۋرالى ەگجەي-تەگجەيلى ايتىپ بەردى. اقمولا وبلىسى بويىنشا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايناگۇل مۋسينا قازىرگى قاۋىپ-قاتەرلەر كەزىندەگى سانيتارلىق-ەپيدەميالىق قىزمەت جۇمىسىنىڭ ماسەلەلەرىنە توقتالدى. سونداي-اق كوروناۆيرۋس جۇقپاسىمەن كۇرەستە دەنساۋلىق ساقتاۋ ۇيىمدارىنىڭ قىزمەتكەرلەرىن قارجىلىق قولداۋ شارالارى مەن ىندەت كەزىندە قىلمىستىق-اتقارۋ جۇيەسى دەپارتامەنتىنىڭ مەكەمەلەرىندە ەپيدەمياعا قارسى ءىس-شارالاردى ۇيىمداستىرۋ جۇمىستارى دا ۇمىت قالعان جوق.
سونىمەن قاتار عىلىمي-پراكتيكالىق كونفەرەنتسيانىڭ پلەنارلىق ءبولىمى ءوتتى. وندا بەلارۋس, ۋكراينا, مولدوۆا, وزبەكستان, قىرعىزستان, تۇركيا ەلدەرىنەن جانە رەسەيدىڭ سانكت-پەتەربۋرگ, ارحانگەلسك, ومسك قالالارىنان كەلگەن مەديتسينا عىلىمدارىنىڭ دوكتورلارى, بەلگىلى حيرۋرگ دارىگەرلەر بايانداما جاسادى. پلەنارلىق بولىمدە جامان تۇماۋعا بايلانىستى العاشقى كەزەڭدە ورىن العان كەمشىلىكتەردى جويۋ ماسەلەلەرى مۇقيات ساراپقا سالىندى. وتكەننەن ساباق الىپ, الداعى ۋاقىتتا قولبايلاۋ بولعان كەيبىر ماسەلەلەردى شەشۋ جايى قاراستىرىلدى.
كوكشەتاۋ