قازاقستاندا تۇڭعىش رەت كوپتەگەن بەدەلدى ماراپاتتاردىڭ يەسى, ايگىلى ەكو-فوتوگراف مەندي باركەردىڭ كورمەسى اشىلدى. تەللي گالەرەياسىندا قازاقستاندىق فوتوسۋرەت ونەرىن باعالاۋشىلارعا ۇسىنىلعان مەندي باركەردىڭ تەڭىزدەردەگى پلاستيكالىق قالدىقتار تۋرالى فوتوسۋرەتتەرى سوڭعى 10 جىلدا بۇكىل الەمگە تانىمال بولدى.
بۇل تۋىندىلار بارشا ادامزاتقا سۇلۋلىقتى كۇتپەگەن جەردەن دە كورۋگە بولاتىنىن كورسەتتى. ونىڭ جۇمىسىنىڭ بىرەگەيلىگى – قالدىقتاردى كەرەمەت ونەر تۋىندىلارىنا اينالدىرۋ. كورەرمەندەردىڭ كوبى الدىندا تۇرعان پلاستيكالىق بەينەلەردىڭ فوتوسى ەكەنىن بىردەن تۇسىنە المايدى.
باركەردىڭ فوتوسۋرەتتەرى اسەرلى. ونىڭ جۇمىستارى 40-تان استام ەلدىڭ باسپالارىندا, سونىڭ ىشىندە National Geographic جۋرنالى, TIME جۋرنالى, The Guardian, The Financial Times جانە باسقا دا كوپتەگەن باسپاسوزدە جاريالاندى. م.باركەر بۇۇ-نىڭ شتاب-پاتەرىندە, لوندونداعى ۆيكتوريا مەن البەرت مۇراجايىندا جانە گونكونگتاعى عىلىمي-تەحنولوگيالىق پاركىندە, جالپى الەم بويىنشا كوپتەگەن كورمە وتكىزدى.
باتىل دا كوركەم كوزقاراس جانە جەتەكشى عالىمدارمەن, جالپى قوعاممەن جانە ەڭ بەدەلدى تابيعات قورعاۋ ۇيىمدارىمەن ىنتىماقتاستىق مەندي باركەردى بىرەگەي فوتوگراف ءارى بەلسەندى رەتىندە تانىتتى. ول ماڭىزدى الەمدىك ساياسي جانە ەكولوگيالىق كونفەرەنتسيالاردا ءسوز سويلەدى, ستەنفورد ۋنيۆەرسيتەتىندە ءدارىس وقىدى. باركەر جۇمىسىنىڭ ماقساتى – ءبىز ءومىر ءسۇرىپ وتىرعان الەمگە قامقورلىقتىڭ ماڭىزىن جانە بولاشاق ۇرپاققا تابيعاتتى ساقتاۋ قاجەتتىلىگىن كورسەتۋ.
– قازىر قازاقستاندا قورشاعان ورتانى قورعاۋ ماسەلەلەرىنە كوبىرەك كوڭىل بولىنەتىنى قۋانتادى. ءبىز مەندي باركەردىڭ تۇتىنۋ جاۋاپكەرشىلىگى تۋرالى تۋىندىلارىن تاعى ءبىر رەت ەسكە سالىپ, جاستاردى ەكولوگيالىق ماسەلەلەر بويىنشا تاربيەلەۋدى كوزدەدىك, – دەيدى Telli Kazakhstan ديرەكتورى جانار الەنوۆا.
قازاقستاندىقتاردى زاماناۋي فوتوسۋرەت شەدەۆرلەرىمەن تانىستىرۋ ءۇشىن 2015 جىلى الماتىدا Telli گالەرەياسى اشىلدى. جاھاندىق ەكولوگيا تاقىرىبى – Telli Gallery كورمە باعدارلاماسىنداعى باستى تاقىرىپتاردىڭ ءبىرى. ونەر قارىم-قاتىناستىڭ ءبىر ءتۇرى رەتىندە تاربيەلەۋگە جانە قاجەتتى اقپارات بەرۋگە قابىلەتتى. مەندي باركەر پلاستيكتى تۇتىنۋ مەن ونىڭ زياندى اسەرى تۋرالى ءوزىنىڭ تۋىندىلارى ارقىلى وزگەلەرمەن قاتىناسقا شىعادى. كورمەنىڭ كىشكەنتاي كەلۋشىلەرى ءۇشىن الەمنىڭ ۇلكەن كارتاسى جاسالدى, وندا بالالارعا قوقىستى دۇرىس سۇرىپتاۋدى ويىن تۇرىندە ۇيرەتەدى.
دوستىق داڭعىلى, 250 مەكەن-جايى بويىنشا ورنالاسقان تەللي گالەرەياسى ۇلىبريتانياداعى ەڭ تانىمال فوتوگراف جۇمىسىنىڭ عاجاپ ەستەتيكاسىن باعالاۋعا شاقىرادى.