جاقىندا اتىراۋ وبلىستىق جاستار ساياساتى باسقارماسىنىڭ ۇيىمداستىرۋىمەن «Biz birgemiz: Asyl mura» جوباسى اياسىندا «Babalar izimen» ەكسپەديتسيالىق تۋرى ۇيىمداستىرىلدى. ەكسپەديتسيالىق تۋردىڭ نەگىزى 2 كۇندى قۇراپ, اتىراۋ ولكەسىنىڭ كيەلى جەرلەرىنىڭ كارتاسى نەگىزىندە تاريحي ورىندارمەن ەكسپەديتسيا مۇشەلەرى تانىستى.
ەكسپەديتسيا قۇرامى ءوز جۇمىسىن قازاق حاندىعىنىڭ استاناسى سارايشىق قالاشىعىنان باستادى. سارايشىق ساپارىندا مۋزەي – قورىقتىڭ ديرەكتورى مۇقتار ابىلسەيىت الداعى جىلداردا جوسپارلانعان ءىس-شارالارمەن تانىستىردى. مۋزەي قىزمەتكەرى ورىن ساعىنباەۆا ارحەولوگيالىق قازبا جۇمىستارى جۇرگىزىلىپ جاتقان قالاشىقپەن تانىستىرىپ, سول داۋىردەگى تۇرعىن ۇيلەردىڭ ەرەكشەلىكتەرىن ءتۇسىندىردى.
ەكسپەديتسيا مۇشەلەرى اتىراۋ وبلىسى, ماحامبەت, يندەر اۋدانىندا ورنالاسقان ايتىسكەر اقىن بالا وراز وتەباي ۇلىنىڭ, زار زامان اقىنى مۇرات موڭكە ۇلىنىڭ, كۇرەسكەر اقىن ماحامبەت وتەمىس ۇلىنىڭ زيراتىنا بارىپ, تاعزىم ەتتى. ەل قايران قالاتىنداي ايگىلى تۇزدىكولدىڭ جاعاسىنا بارىپ, تىلسىم تابيعاتتىڭ ەرەكشەلىگىمەن تانىستى.
ساپاردىڭ ەكىنشى كۇنى اتىراۋ وبلىسى, جىلىوي اۋدانىندا ورنالاسقان تاريحي ورىندارمەن تانىسۋمەن جالعاستى. جۇبان اتا مازارى, يمانقارا ۇڭگىرى, اقكەگەرشىن بورلى ءۇستىرتى, اقمەشىت, قۇلشان اتا مازارى سىندى تاريحي ورىندارىنا ەكسپەديتسيا مۇشەلەرى بارىپ, تىڭ دەرەكتەرمەن تانىستى.
ادىلبەك ومىرزاقوۆ,
ەكسپەديتسيا مۇشەسى
اتىراۋ – ماحامبەت – يندەر-جىلىوي – اتىراۋ