قازاقستاننىڭ استاناسىندا سەرۋەندەپ قانا قويماي, ادەمى كورىنىستەردى تاماشالاپ, قالانىڭ قاربالاسىنان دەمالۋعا بولاتىن ورىندار كوپ, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
اكىمدىكتىڭ رەسمي سايتى نۇر-سۇلتانداعى ەڭ كوركەم جەرلەر توپتاماسىن دايىندادى.
ترياتلون, پرەزيدەنت ساياباقتارى مەن ەسىل وزەنىنىڭ جاعالاۋى. قازىرگى ۋاقىتتا بۇل جەرلەردى جاياۋ جۇرگىنشىلەر ايماقتارى مەن ۆەلوسيپەد جولدارى بايلانىستىرادى, ولار قاجەتتى ينفراقۇرىلىممەن جابدىقتالعان. ەلوردالىق جاستار بوس ۋاقىتىندا سپورتپەن شۇعىلدانۋى ءۇشىن وسى جازدا كوپتەگەن كوپىر استى كەڭىستىكتەرى پايدا بولدى.
«جەرۇيىق» ساياباعىنىڭ 21 گەكتار اۋماعىندا اعاش پەن بۇتانىڭ 11 تۇرىنەن تۇراتىن توعاي بار. قازىرگى كەزدە ولاردىڭ سانى 10 مىڭ داناعا جەتىپ وتىر. ۇلكەن ساياباقتى ورىندىقتار مەن مۇسىندەر ورناتىلعان كوپتەگەن جولدار مەن ۆەلوجولدار كەسىپ وتەدى.
نۇر-سۇلتان بوتانيكالىق باعى –قازاقستاننىڭ استاناسىنداعى ەڭ ۇلكەن, ەڭ جاس ساياباق. باقتىڭ شىعىس بولىگىندە سۋبۇرقاقتار مەن ءۇش كوپىرلى توعان بار. مۇندا ەۋروپادان, ازيادان جانە سولتۇستىك امەريكادان 90 مىڭعا جۋىق اعاش پەن بۇتا, جۇزدەگەن كوللەكتسيالىق كوشەتتەر وتىرعىزىلدى. ۆەلوسيپەد پەن جۇگىرۋ جولدارى جاسىل ايماقتاردا دا كەزدەسەدى.
ەلوردانىڭ باستى بۋلۆارى «نۇر جول» قوناقتاردى كۇن سايىن مۋزىكالىق فونتاندارمەن جانە ەرەكشە مۇسىندەرمەن قارسى الادى. جاياۋ جۇرگىنشىلەر ايماعىنىڭ بويىندا شەتەلدىك جانە جەرگىلىكتى ساۋلەتشىلەردىڭ ەرەكشە عيماراتتارى بار. كەشكە بۋلۆار كوپتەگەن شامدارمەن جارىقتاندىرىلادى. جاياۋ سەرۋەنشىلەر ءبىر جاعىنان اقورداداعى پرەزيدەنت سارايىن دا, الەمدەگى ەڭ ۇلكەن شاتىر ءتارىزدى قۇرىلىم – «حان شاتىر» ساۋدا ويىن-ساۋىق ورتالىعىن دا كورە الادى.
ايتا كەتەيىك, ەلوردا قوناقتارى مەن تۇرعىندارىنا ىڭعايلى بولۋ ءۇشىن اۋلالار مەن قوعامدىق ورىنداردى اباتتاندىرۋعا كوپ كوڭىل بولىنۋدە. بيىلدىڭ وزىندە نۇر-سۇلتاندا 150 اۋلا مەن 50 قوعامدىق ورىن اباتتاندىرىلدى. بۇل 300 مىڭنان استام ادامدى سپورتپەن اينالىسۋعا قولايلى جاعدايلارمەن قامتاماسىز ەتۋگە مۇمكىندىك بەرەدى.