تۇركىستان وبلىسىنىڭ ديقاندارى تىكەلەي سەبۋ ادىسىمەن 168 مىڭ گەكتار القاپقا كۇزدىك استىق ەگۋدى باستادى. No-till تەحنولوگياسى, ياعني جاڭا ادىستىڭ العاشقى سىناعى وڭىردە وسىدان 3 جىل بۇرىن باستالعان بولاتىن, دەپ حابارلايدى Egemen.kz.
برازيليادان الىنعان ءدان سەپكىش قۇرىلعىنىڭ كومەگىمەن, ماساقتى داقىلداردىڭ تۇسىمدىلىگى 2 ەسە ارتقان.
قازىعۇرت اۋدانى, "شاربۇلاق" اۋىلدىق وكرۋگىندە وتكەن سەمينار-كەڭەستە جاڭا تەحنولوگيالاردىڭ پايدالانىلۋى جايىندا كەڭىنەن ايتىلدى. اشىق اسپان استىندا وتكەن باسقوسۋعا وبلىس اكىمى ومىرزاق شوكەەۆ, اگروبيزنەس وكىلدەرى, اۋدان, قالا اكىمدەرى مەن شارۋالار قاتىستى. ءسۇر تاناپتا قالدىرماي تىكەلەي سەبۋ ادىستەرىن الەمنىڭ دامىعان ەلدەرى, اتاپ ايتقاندا اقش, كانادا, برازيليا, ارگەنتينا ەلدەرىنىڭ شارۋالارى كەڭىنەن پايدالانادى. سوڭعى جىلدارى كوپ ەلدەردە نولدىك تەحنولوگيانى پايدالانۋ ارقىلى وسىرىلەتىن ەگىستىكتىڭ كولەمى ارتىپ كەلەدى.
ايدالماعان جەرگە داقىلداردى تىكەلەي سەبۋدىڭ تيىمدىلىگى ەلىمىزدىڭ سولتۇستىك ايماقتارىندا دا, اسىرەسە شولەيتتى, سۋ جانە جەل ەروزياسىنا ۇشىراعان جەرلەردە دالەلدەنگەن. سەمينار-كەڭەستە وبلىس اكىمى جاڭا تەحنولوگيالارعا مىندەتتى تۇردە كوشۋ قاجەتتىگىن اتاپ ءوتتى.
"ويتكەنى مىنا باسەكەلەستىك زاماندا ءداستۇرلى تەحنولوگيا الىسقا اپارمايدى ءبىزدى. نولدىك تەحنولوگيانى وتە بەلسەندى قولعا الىپ جاتقان شارۋا قوجالىقتارى بار. بۇل جەردە باتىلدىق كەرەك", دەدى ومىرزاق ەستاي ۇلى.
سونداي-اق جيىندا وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ قازاقستانداعى ماقتانى ساتىپ الۋ باعاسىنىڭ بەكىتىلۋىن جاريالادى. وڭىردەگى 18 ماقتا وڭدەيتىن كاسىپورىن ءشيتتى ماقتانىڭ تونناسىن 130 مىڭ تەڭگەدەن قابىلداۋدى باستادى. ىرىلەنگەن اگروقۇرىلىمدار ءۇشىن ءشيتتى ماقتا باعاسى ءالى دە وسەدى دەپ كۇتىلۋدە.
تۇركىستان وبلىسى