ورتا سالماقتاعى قازاقستاندىق كاسىپقوي بوكسشى جانىبەك ءالىمحان ۇلى ءوزىنىڭ كەزەكتى جەكپە-جەگىن وتكىزىپ, ارگەنتينالىق قارسىلاسىن ەكىنشى راۋندتا سۇلاتىپ سالدى.
اقش-تىڭ لاس-ۆەگاس قالاسىنداعى (نەۆادا شتاتى) The Bubble سپورت كەشەنىندە وتكەن كەزدەسۋ 10 راۋندقا جوسپارلانعان بولاتىن. الايدا ارگەنتينالىق بوكسشى گونسالو كوريۋ (16-3, 6 كو) جەرلەسىمىزدىڭ جويقىن قيمىلىنا توتەپ بەرە الماي, ەكىنشى راۋندتا جانىبەكتىڭ اۋىر سوققىسىنان كەيىن جەكپە-جەكتى ءارى قاراي جالعاستىرا المادى. ءبىرىنشى راۋندتا جانىبەك قارسىلاسىن ءبىر رەت نوكداۋنعا تۇسىرگەنىن دە ايتا كەتەيىك.
مۇحيتتىڭ ارعى بەتىندە جۇدىرىقتاسىپ جۇرگەن جانىبەك ءالىمحان ۇلى وسىمەن كاسىپقوي بوكستا توعىزىنشى مارتە جەڭىسكە جەتىپ, بەسىنشى كەزدەسۋىن مەرزىمىنەن بۇرىن اياقتادى. بۇل جەڭىسىنەن كەيىن ول ورتا سالماقتاعى الەمدىك رەيتينگتە 7 ساتى جوعارىلاپ, 23-ورىنعا تۇراقتادى.