«دوستىق» وردەنىمەن ماراپاتتالدى

اباي قۇنانباي ۇلىنىڭ مۇرا­سىن ناسيحاتتاۋعا سىڭىرگەن ەڭبەك­تەرى ءۇشىن اتالعان تۇلعالاردى مەم­لە­كەتتىك ماراپاتپەن ناگرادتاۋ تۋرالى جارلىققا قازاقستان پرەزيدەنتى قاسىم-جومارت توقاەۆ 2020 جىلعى 4 تامىزدا قول قويعان بولاتىن.

حا حۋانچجان (ادەبيەتتەگى لاقاپ اتى – قاباي) اباي شىعار­ما­شى­لىعىن زەرتتەۋگە ءومىرىن ارنا­عان العاشقى شەتەلدىك ادەبيەت­تانۋشىلاردىڭ ءبىرى. 1958 جىلى حا حۋانچجاننىڭ «اباي قۇنان­باي ۇلى. ءۇش ولەڭ» اتتى تۇڭعىش اۋدارمالار جيناعى جارىق كور­دى. سول جىلى قحر شۇاا-دا شى­عا­تىن «تيان-شان» جۋرنالى «قازاقستاننىڭ ۇلى اقىنى – اباي قۇنانباي ۇلى» اتتى ونىڭ اباي تۋرالى العاشقى عىلىمي ماقالاسىن جاريالادى.

ونىڭ «اباي ولەڭدەرى» جانە «قارا سوزدەر» اتتى قىتاي تىلىندەگى اۋدارمالارىن شىنجاڭ باسپاسى 1982 جانە 1984 جىلدارى باسىپ شىعاردى. ءۇش جىلدان كەيىن بەي­جىڭ­دە قا­باي­دىڭ «اباي جانە ونىڭ پوەزيا­سى» اتتى ماقالالار جيناعى, ال 1994 جىلى ول قۇراستىرعان «اباي شى­عار­مالارىنىڭ تولىق جيناعى» قىتاي تىلىندە جارىق كوردى.

حا حۋانچجاننىڭ ەڭ ەلەۋلى ەڭبەكتەرىنىڭ ءبىرى – مۇحتار اۋە­زوۆ­تىڭ الەمگە ايگىلى «اباي جولى» رومان-ەپوپەياسىنىڭ اۋدارماسى. بۇل جۇمىسقا ول 14 جىل جۇمساعان بولاتىن.

اكبار ءماجيت ۇلى – قىتاي تىلىندە جازاتىن قحر-دىڭ از ۇلتتار وكىلدەرىنىڭ كورنەكتى جازۋ­شى­لارىنىڭ ءبىرى. 1982 جىلدان باس­تاپ قىتاي جازۋشىلار وداعىنىڭ مۇ­شەسى, كەزىندە قحر حالىقتىق-سايا­سي كونسۋلتاتيۆتىك كەڭەسىنىڭ دەپۋتاتى بولعان, قحر مەملەكەتتىك سىيلىعىنىڭ ءۇش مارتە يەگەرى, وننان استام كىتاپتىڭ, ونىڭ ىشىندە اباي شىعارمالارى اۋدارمالارىنىڭ اۆتورى.

جاقىندا, قىركۇيەك ايىندا اكبار ماجيت ۇلىنىڭ «اباي قۇنان­باي ۇلىنىڭ شىعارمالارى قىتاي تىلىندە» اتتى 2 تومدىق جيناعى جا­رىق كوردى.

اكبار ءماجيت ۇلىنىڭ اۋدارمالارى مەن ىزدەنىستەرىنىڭ ارقاسىندا بۇگىندە قىتاي وقىرماندارى اباي قۇنانباي ۇلىنىڭ اقىندىق جانە فيلوسوفيالىق مۇراسىمەن قاتار قازاق ادەبيەتىنىڭ باسقا دا كورنەكتى كلاسسيكتەرىنىڭ شىعارمالارىمەن جاقىن تانىسۋعا مۇمكىنشىلىك الۋدا.