قازاقستان ۇكىمەتى مەن «Siemens AG» كومپانياسى اراسىنداعى ءوزارا تۇسىنىستىك تۋرالى مەموراندۋمدى ىسكە اسىرۋ شەڭبەرىندە يندۋستريا جانە ينفراقۇرىلىمدىق دامۋ ۆيتسە-ءمينيسترى د.ششەگلوۆانىڭ باسشىلىعىمەن گەرمانيانىڭ ونەركاسىپتىك الىبى وكىلدەرىمەن اشىق ونلاين-ديالوگ ءوتتى.
ءىس-شاراعا نەمىس تاراپىنان جوبالىق كوماندانىڭ باسشىسى مەتيۋ ۆاتسون جانە ۇكىمەتتەرمەن بايلانىس جونىندەگى سىرتقى قاتىناستار ءبولىمىنىڭ باسشىسى كريستيان مەدسەن, قازاقستان تاراپىنان مينيسترلىك وكىلدەرى, «QazIndustry» قيەو» اق توراعاسىنىڭ ورىنباسارى ت.مۇقانوۆ جانە «يتپ» دكق باس ديرەكتورى ا.سەمبين قاتىستى.
ديالوگ بارىسىندا قازاقستاندىق تاراپ «Siemens AG» كومپانياسىنىڭ نازارىنا وتاندىق ونەركاسىپتى دامىتۋدىڭ نەگىزگى ۇردىستەرى, مينيسترلىكتىڭ وسى سالاداعى قىسقامەرزىمدى جانە ستراتەگيالىق جوسپارلارى, ونەركاسىپتىك كاسىپورىنداردىڭ پروبلەمالارى, سونداي-اق مەملەكەتتىك قولداۋدىڭ قولدانىستاعى شارالارى تۋرالى اقپاراتتى جەتكىزدى. سونىمەن قاتار تەحنولوگيالىق جاڭعىرتۋدىڭ جانە ونەركاسىپتى تسيفرلاندىرۋ بويىنشا جۇرگىزىلىپ جاتقان جۇمىستىڭ, سونداي-اق قازاقستان اۋماعىندا تاۋ-كەن مەتاللۋرگيا كەشەنى بويىنشا قۇزىرەتتەر ورتالىقتارىن قۇرۋدىڭ ماڭىزدىلىعى اتاپ ءوتىلدى. وسىعان بايلانىستى تاراپتار قازاقستاندىق كاسىپورىنداردا يندۋستريا 4.0 ەلەمەنتتەرىن ەنگىزۋ جانە IT تەحنولوگيالاردى جەتىلدىرۋ ماسەلەلەرىندە بايلانىستاردى جانداندىرۋعا جانە ىنتىماقتاستىقتى دامىتۋعا كەلىستى.
كەزدەسۋ قورىتىندىسى بويىنشا تاراپتار جاقىن بولاشاقتا ىنتىماقتاستىق دەڭگەيىن ارتتىرۋعا دايىن ەكەندىكتەرىن ءبىلدىردى. اتاپ ايتقاندا, اشىق ديالوگ فورماتىندا سالالىق پروبلەمالاردى تالقىلاۋ ءۇشىن وتاندىق ونەركاسىپتىك كاسىپورىندار باسشىلىعىمەن بىرقاتار كەزدەسۋلەر وتكىزۋ تۋرالى ۋاعدالاستىققا قول جەتكىزىلدى.