ەلوردادا نازارباەۆ ۋنيۆەرسيتەتىنىڭ يننوۆاتسيالىق كلاستەرىنىڭ Fab Lab الاڭىندا «TOM:Nur-Sultan» مەيكاتونىنىڭ ءبىرىنشى كەزەڭى باستالدى. 72 ساعاتتىق مارافون بارىسىندا 14 كوماندا مۇمكىندىگى شەكتەۋلى جانداردىڭ ءومىرىن جاقسارتاتىن قۇرىلعىلاردىڭ تاجىريبەلىك ۇلگىلەرىن ۇسىنادى. ونەرتابىستار پايدالانۋ وڭاي, ءوندىرىسى قاراپايىم جانە قول جەتىمدى بولۋى كەرەك, دەپ حابارلايدى Egemen.kz.
ۇزدىك يدەيالار مەيكاتوننىڭ 13-16 قاراشا ارالىعىندا وتەتىن ەكىنشى كەزەڭىنە جولداما الادى.
«مەيكاتونعا 14 كوماندا قاتىسادى. ولاردىڭ 10-ى عانا ەكىنشى كەزەڭگە وتە الادى. بايقاۋ كوميسسياسى تاڭداعان جوبالاردى قاتىسۋشىلار ءبىر اي ىشىندە ونلاين رەجيمدە پىسىقتايدى. قاراشا ايىندا ولار ازىرلەمەلەرىن قۇزىرەتتى قازىلار القاسىنا ۇسىنۋى كەرەك», – دەيدى «استانا جاستارى» جاستار رەسۋرستىق ورتالىعىنىڭ جەتەكشىسى شىڭعىس تىلەۋلين.
سونىمەن بىرگە جاس ونەرتاپقىشتارعا پروتوتيپتەرى جاسالاتىن مۇمكىندىگى شەكتەۋلى جاندار كەڭەس بەرەدى. حابارلامادا اتاپ كورسەتىلگەندەي, ىرىكتەۋگە «قازاقستان مۇگەدەكتەر كونفەدەراتسياسى» رقب قوعامدىق بىرلەستىگى قولداۋ كورسەتتى.
سونىمەن قاتار, توپتارعا وڭالتۋ, حيرۋرگيا جانە IT سالاسىنداعى مامانداردىڭ كەڭەستەرى بەرىلەدى.
ايتا كەتۋ كەرەك, ءىس-شارانىڭ ۇيىمداستىرۋشىلارى ەلوردالىق جاستار ساياساتى ماسەلەلەرى باسقارماسى, «استانا جاستارى» جاستار رەسۋرستىق ورتالىعى, نازارباەۆ ۋنيۆەرسيتەتىنىڭ يننوۆاتسيالىق كلاستەرىنىڭ Fab Lab, تەل-اۆيۆ ۋنيۆەرسيتەتىنىڭ دوستار قاۋىمداستىعى.