سەنات دەپۋتاتى مۇحتار قۇل-مۇحاممەد بەينە كونفەرەنتسيا بايلانىسى ارقىلى تمد پارلامەنتارالىق اسسامبلەياسى جانىنداعى قاۋىپسىزدىك سالاسىنداعى زاڭنامانى ۇيلەستىرۋ جانە جاڭا قاۋىپ-قاتەرگە قارسى ءىس-قيمىل جونىندەگى بىرلەسكەن كوميسسيانىڭ, سونداي-اق تمد پاا قورعانىس جانە قاۋىپسىزدىك ماسەلەلەرى جونىندەگى تۇراقتى كوميسسياسىنىڭ وتىرىستارىنا قاتىستى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
كوميسسيا وتىرىستارىنا تمد پاا قورعانىس جانە قاۋىپسىزدىك ماسەلەلەرى جونىندەگى تۇراقتى كوميسسياسىنىڭ مۇشەلەرى, تمد سالالىق ىنتىماقتاستىق ورگاندارىنىڭ, دوستاستىق مەملەكەتتەرىنىڭ مەملەكەتتىك بيلىك ورگاندارىنىڭ, سونداي-اق ءبىلىم بەرۋ جانە عىلىمي مەكەمەلەردىڭ, حالىقارالىق ۇيىمداردىڭ وكىلدەرى قاتىستى.
وتىرىس بارىسىندا "ۇلتتىق قاۋىپسىزدىك تۋرالى" ۇلگى زاڭ جوباسى, تمد-عا قاتىسۋشى مەملەكەتتەر قارۋلى كۇشتەرىنىڭ, اسكەري كاسىپتىك ءبىلىم بەرۋ جۇيەسىنىڭ جانە اسكەرلەردى دايارلاۋدىڭ باسشى قۇجاتتارىنا حالىقارالىق گۋمانيتارلىق قۇقىق ەرەجەلەرىن كىرىكتىرۋ بويىنشا ۇسىنىمدار جوباسى قارالدى, سونداي-اق "شۇعىل جەدەل قىزمەتتەردى شاقىرۋدىڭ بىرىڭعاي جۇيەسى تۋرالى" ۇلگى زاڭ جوباسىمەن جۇمىس بارىسى تۋرالى بايانداما تىڭدالدى.
سونىمەن قاتار تمد پاا ساياسي ماسەلەلەر جانە حالىقارالىق ىنتىماقتاستىق جونىندەگى تۇراقتى كوميسسياسىنىڭ وتىرىسى بولدى, وعان سەنات دەپۋتاتى نۇرجان نۇرسيپاتوۆ قاتىستى.
وتىرىسقا قاتىسۋشىلار قارۋلى قاقتىعىستار مەن تەرروريستىك ارەكەتتەرگە COVID-19 پاندەمياسىنىڭ اسەرى تۋرالى ماسەلەنى قارادى. سونداي-اق 2021 جىلعا جوسپارلانعان حالىقارالىق تەرروريزمگە قارسى ءىس-قيمىل جونىندەگى كونفەرەنتسياعا دايىندىق بارىسى تۋرالى بايانداما تىڭدالدى.
كۇن تارتىبىنە سايكەس ەگەمەن مەملەكەتتەردىڭ ىشكى ىستەرىنە سىرتتان ارالاسۋعا جول بەرمەۋ تۋرالى, وتكەن بۇۇ كونترتەرروريزمىنىڭ ۆيرتۋالدى اپتاسى (2020 جىلعى 6-10 شىلدە) تۋرالى جانە تاۋەلسىز مەملەكەتتەر دوستاستىعى اياسىندا سىرتقى ىستەر مينيسترلىكتەرىنىڭ كوپ دەڭگەيلى كەڭەسۋلەرىنىڭ 2021 جىلعا ارنالعان جوسپارىن ىسكە اسىرۋ تۋرالى ماسەلەلەر قارالدى.