جامبىلدىق تۇرعىن ۆيكتوريا ميحايلوۆا ءوزىنىڭ ون جاسار نەمەرەسى كونستانتيننىڭ ارمانى تۋرالى جامبىل وبلىستىق پوليتسيا دەپارتامەنتىنىڭ Instagram الەۋمەتتىك پاراقشاسىنا جازبا قالدىرعان. اجەسى ءوز جازباسىندا نەمەرەسىنىڭ پوليتسيا دەپارتامەنتى بويىنشا ەكسكۋرسيا ۇيىمداستىرعىسى كەلەتىنىن, ءتىپتى دەپارتامەنت باستىعىمەن كەزدەسۋدى قالايتىنىن ايتقان, دەپ حابارلايدى Egemen.kz.
اجەنىڭ ءوتىنىشى مەن بالانىڭ تىلەگىن ەسكەرگەن وبلىستىق پوليتسيا دەپارتامەنتىنىڭ باستىعى, پوليتسيا گەنەرال-مايورى جانات سۇلەيمەنوۆ ءوزىنىڭ جۇمىس كابينەتىندە كونستانتينمەن كەزدەستى.
اجەسىمەن بىرگە پوليتسيا دەپارتامەنتىنە كەلگەن بالا گەنەرالعا ءوزىنىڭ وقۋداعى جەتىستىكتەرى, شاحماتقا اۋەستىگى مەن تاڭداعان بولاشاق ماماندىعى تۋرالى ايتىپ بەردى. كونستانتين ۇلگىلى وقۋشى بولۋمەن قاتار, «اقبوتا», «پوني», «رۋسسكي مەدۆەجونوك» جانە «كەنگۋرۋ» سەكىلدى زياتكەرلىك كونكۋرستاردىڭ جۇلدەگەرى اتانعان.
سونداي-اق, ون جاسار بالا ۇدايى پاترۋلدىك پوليتسيا كولىكتەرىن ەرەكشە قىزىعۋشىلىقپەن باقىلاپ وتىرادى ەكەن. پوليتسەيلەردىڭ جۇمىسى تۋرالى مۇمكىندىگىنشە كوپ بىلگىسى كەلەتىنىن ايتقان كونستانتينگە گەنەرال-مايور جانات سۇلەيمەنوۆ دەپارتامەنتتىڭ مۋزەيىندە بولىپ, ىشكى ىستەر ورگاندارىنىڭ قالىپتاسۋ تاريحىمەن تانىسۋدى ۇسىندى. بۇدان كەيىن كونستانتين تاراز قالاسىنداعى جەدەل باسقارۋ ورتالىعىندا بولىپ, ۇلكەن ەكراننان بۇكىل قالانىڭ كورىنىسىن تاماشالادى.
كەزدەسۋ سوڭىندا جانات سۇلەيمەنوۆ كونستانتينگە مىقتى دەنساۋلىقپەن وقۋدا تابىس تىلەپ, قازاقستان رەسپۋبليكاسى ىشكى ىستەر مينيسترلىگىنىڭ ەمبلەماسى بار قولساعات سىيلادى. ال, بالانىڭ اجەسى ۆيكتوريا ميحايلوۆا وبلىستىڭ باس پوليتسەيىنە جىلى قابىلداۋى ءۇشىن العىسىن ءبىلدىرىپ, بۇل كەزدەسۋ نەمەرەسىنىڭ جادىندا ۇزاق جىلدار بويى ساقتالاتىنىن ايتتى.
جامبىل وبلىسى