ماقتاارال اۋداندىق پوليتسيا بولىمشەسىنىڭ كريمينالدىق پوليتسيا قىزمەتكەرلەرى حابار-وشارسىز كەتكەن جاس ايەلدىڭ ءولىمىن اشتى, دەپ حابارلايدى Egemen.kz
تۇركىستان وبلىسىنىڭ پوليتسەيلەرى ءىز-ءتۇسسىز جوعالىپ كەتكەن ايەلدى ولتىرۋگە قاتىسى بار دەگەن كۇدىكپەن ەكى ەر ادامدى ۇستادى. كۇدىكتى رەتىندە تولەم تەرمينالدارىنان اقشا ۇرلاۋعا قاتىسى بار ەكى جەرگىلىكتى تۇرعىن قۇرىقتالدى.
تەرگەۋ بارىسىندا جاستار پايداكۇنەمدىك ماقساتتا اۋىر قىلمىس جاساعانىن مويىندادى. اعىمداعى جىلدىڭ قىركۇيەك ايىنىڭ باسىندا ماقتاارال اپب كەزەكشى بولىمىنە جەرگىلىكتى تۇرعىن ءسىڭلىسىنىڭ جۇمىستان كەيىن ۇيىنە ورالماي, حابار-وشارسىز جوعالىپ كەتكەنى تۋرالى ارىزدانعان. تەكسەرىس كەزىندە پوليتسەيلەر جوعالعان ايەلدىڭ ەر بالاسى بار ەكەنىن, دۇكەندە ساتۋشى بولىپ جۇمىس ىستەگەنىن جانە جوعالار الدىندا وتباسىندا ەشقانداي كيكىلجىڭ بولماعانىن انىقتادى.
پوليتسيا قىزمەتكەرلەرى دەرەۋ جوعالعان ايەلدى ىزدەستىرۋ جۇمىستارىن باستادى. الايدا قارقىندى جۇمىستار وڭ ناتيجە بەرمەگەن. ارادا ءۇش اپتا وتكەندە عانا پوليتسيا جەرگىلىكتى كانالداردىڭ بىرىندە بەلگىسىز ايەلدىڭ قاڭقاعا اينالعان ءمايىتى مەن كيىمدەرىن تاپتى. العاشقىدا الدىن الا تەكسەرۋ كەزىندە جابايى اڭداردان زارداپ شەككەن ءمايىتتى جانە ءولىمنىڭ سەبەبىن انىقتاۋ مۇمكىن بولمادى. جابىرلەنۋشىنىڭ جەكە باسىن انىقتاۋ ءۇشىن كريميناليستەر مەن جەدەل ۋاكىلدەر كۇنى-ءتۇنى جۇمىس ىستەدى. پوليتسەيلەر ءمايىتتىڭ بۇزىلماعان بولىگىن تاۋىپ, ايعاق رەتىندە ساراپتاماعا جولدادى.
ساراپتاما قورىتىندىسىنا جانە تۋىستارىنىڭ كيىم-كەشەگىن تانۋىنا بايلانىستى جەدەل ۋاكىلدەر ءمايىتتىڭ حابار-وشارسىز جوعالعان ماقتاارال اۋدانىنىڭ تۇرعىنى ەكەنىن انىقتادى. قىلمىستىق ءىس قر قك-ءنىڭ 99-بابى (كىسى ءولتىرۋ) بولىپ قايتا دارەجەلەندى.
اۋىر قىلمىستى اشۋ ءۇشىن قۇرىلعان جەدەل-تەرگەۋ توبىنىڭ ماماندارى كوپ ۇزاتپاي, وسى قىلمىسقا قاتىسى بار دەگەن كۇدىكپەن تولەم تەرمينالدارىنان اقشا ۇرلاۋعا قاتىسى بار ەكى جەرگىلىكتى تۇرعىندى ۇستادى. ولار جاس ايەلگە شابۋىل جاساپ, تۇنشىقتىرىپ, سودان كەيىن وعان پىشاق جاراقاتىن سالعان. سودان سوڭ كۇدىكتىلەر 300 مىڭ تەڭگەنى جىمقىرىپ, قىلمىس ورنىنان قاشىپ كەتكەن. ولار ۇرلانعان اقشانىڭ ءبىر بولىگىن ءوز قاجەتتىلىكتەرىنە جۇمساپ ۇلگەرگەن. قازىرگى تاڭدا اتالعان فاكت بويىنشا سوتقا دەيىنگى تەرگەۋ جۇرگىزىلۋدە. زاتتاي ايعاقتار رەتىندە جابىرلەنۋشىنىڭ زاتتارى, ۇرلانعان م ۇلىكتىڭ ءبىر بولىگى جانە كۇدىكتىلەردىڭ اۆتوكولىگى الىندى. سوت شەشىمىمەن كۇدىكتىلەر ەكى اي مەرزىمگە قاماۋعا الىندى.