شيكىزات وندىرۋمەن شەكتەلمەۋ كەرەك

اۋىلدىڭ ءومىرى, احۋالى بىزگە جاقسى تانىس. سوندىقتان اۋىل شارۋاشىلىعى سالاسىنداعى باستامالاردى, رەفورمالاردى ۇنەمى قاداعالاپ وتىرامىز. شىنى كەرەك, بۇل سالادا شەشىمىن تاپپاي كەلە جاتقان وزەكتى ماسەلەلەر بار. سونىڭ ءبىر پاراسىنا مەملەكەت باسشىسى توقتالدى. اتاپ ايتقاندا, تۇرعىنداردىڭ جەرگە قول جەتكىزە الماۋى, ۇزاق مەرزىمگە بەرىلەتىن ارزان نەسيەنىڭ جوقتىعى, كاسىبي مامانداردىڭ تاپشىلىعى سەكىلدى پروبلەمالار اياققا تۇساۋ بولىپ تۇر.  ونىمدىلىكتى ارتتىرىپ, شيكىزات وندىرۋمەن عانا شەكتەلمەۋ كەرەك.

مەملەكەت باسشىسى بالىق شارۋاشىلى­عىنا ەرەكشە ءمان بەرۋگە شاقىردى. شىنىندا دا, شاشەتەكتەن تابىسقا كەنەلۋگە بولاتىن سالانىڭ ءبىرى – وسى. الايدا ءالى كۇنگە قۇنت­تاماي كەلەمىز. پرەزيدەنتتىڭ وسى جاعدايعا نازار اۋدارۋى سالانىڭ تىنىسىن اشادى دەپ ويلايمىن. ايتپەسە ءار وڭىردە وزەن-كول بار. سولاردى ءتيىمدى پايدالانسا, ءىستىڭ رەتىن تاپسا, بەرەكەگە كەنەلۋگە مۇمكىندىك مول.

اۋىل شارۋاشىلىعىن دامىتۋدا جەكە قوسالقى شارۋاشىلىقتاردىڭ الەۋەتىن پايدالانعان ابزال. جەكە شارۋاشىلىق ميلليونداعان اۋىل تۇرعىندارىنا تابىس تابۋعا مۇمكىندىك بەرەدى. سونىمەن قاتار كووپەراتسيانىڭ الەۋەتىن دە – ەستەن شىعار­ماۋى­مىز قاجەت. ونسىز اگروونەركاسىپ كەشە­نىندە قارقىندى دامۋ بولمايدى. شىن مانىن­دە, باسى بىرىكپەگەن جەكە قوسالقى شارۋا­شىلىقتار ولمەستىڭ كۇنىن كورىپ وتىر. باسەكەگە قابىلەتسىزدىك پەن يمپورتتان ارىلا الماي وتىرۋىمىزدىڭ سەبەبى دە – وسىندا. كووپەراتسيا شارۋاشىلىقتارعا شيكىزات ساتىپ الۋ, ءونىم ءوندىرۋ جانە ونى ساتۋدى ۇيىمداستىرۋ بارىسىندا كۇش جۇمىلدىرۋعا مۇمكىندىك بەرەدى.

جاسىراتىنى جوق, اۋىل ەڭبەككەرلەرى­نىڭ اۋىر جۇمىسى تىم ارزان باعالانادى. تابىستىڭ باسىم بولىگىن الىپساتارلار يەلەنىپ جاتادى. سوندىقتان سۋبسيديا جانە سالىق جەڭىلدىكتەرىن بەرۋ باعدارلامالارى اياسىندا اۋىلدىق جەرلەردەگى كووپەراتسيانى ىنتالاندىرۋ كەرەك دەپ ويلايمىن. اۋىل شارۋاشىلىعى كووپەراتسياسىن دامىتۋ تۋرالى ايتىلىپ كەلە جاتقالى ءبىرشاما جىل بولدى. سوڭى سۇيىلىپ كەتپەسە ەكەن دەيمىز. بۇل – جەكە قوسالقى شارۋاشىلىقتاردى دامىتۋدىڭ بىردەن-ءبىر جولى.

كاسىبي مامانداردىڭ تاپشىلىعى, سون­داي-اق اگرارلىق عىلىمنىڭ ويداعىداي دامىماۋى – اۋىل شارۋاشىلىعى سالاسىنداعى قوردالانعان ماسەلەلەر. وسى باعىتقا جەتە كوڭىل ءبولۋ كەرەك. ايتپەسە ەرتەڭ تەحنيكا تىزگىندەيتىن مامان تاپپاي قينالاتىن كەزەڭگە اياق باسۋىمىز ابدەن مۇمكىن. ءوز باسىم كادر تاپشىلىعىنا قاتىستى ماسەلەنى بىرنەشە كاسىپكەردەن ەستىدىم. سوندىقتان ماسەلەنى تىم تەرەڭگە تامىر جايماي تۇر­عاندا-اق رەتتەگەن ابزال. مەنىڭشە, جاس­تار­دى ىنتالاندىرۋ كەرەك. اۋىل شارۋا­شى­لىعى سالاسىندا جۇمىس ىستەيتىن جاستاردى وزگەلەرگە ۇلگى-ونەگە رەتىندە ناسيحاتتاۋ قاجەت. جالپى اڭعارعانىم, بىزدە عانا ەمەس, الەمنىڭ وزگە ەلدەرىندەگى جاستار دا نەگىزىنەن گۋمانيتارلىق سالاعا دەن قويادى. سول سەبەپتى الەمدىك تەندەنتسيانىڭ ءبىزدى اينالىپ وتپەسى زاڭدىلىق, ارينە. زاڭدىلىق ەكەن دەپ قاراپ وتىرۋعا تاعى بولماس.

قۇدايبەرگەن پىشەمباەۆ,

ەڭبەك ارداگەرى,

ماي اۋدانىنىڭ قۇرمەتتى ازاماتى

پاۆلودار وبلىسى