مەملەكەت باسشىسى كوروناۆيرۋس ىندەتىنىڭ ەكىنشى تولقىنىنا دايىندىق ماسەلەلەرى بويىنشا كەڭەستە 6 ماسەلەگە توقتالدى, دەپ حابارلايدى Egemen.kz.
مەملەكەت باسشىسى بىرقاتار تۇيتكىلدى ماسەلەلەرگە تولىعىراق توقتالدى.
ءبىرىنشى ماسەلە. حالىقتى تەستىلەۋدەن وتكىزۋ قارقىنى تومەندەگەن. كۇنىنە ورتا ەسەپپەن, 40 مىڭنان 60 مىڭعا دەيىن زەرتتەۋ مۇمكىندىگى بار 18 مىڭ زەرتتەۋ جۇرگىزىلەدى. زەرتحانالاردىڭ جۇكتەمەسى 40% قۇرايدى. ءبىز ناقتى جاعدايدى ءبىلۋىمىز كەرەك. سوندىقتان تەستىلەۋ كولەمىن ۇلعايتۋ ءۇشىن شارالار قابىلداۋ قاجەت.
ەكىنشى ماسەلە.ء بىز جاز ايلارىندا ءدارى-دارمەك تاپشىلىعىن ايقىن سەزىندىك. مەنىڭ تاپسىرمام بويىنشا ناقتى جۇمىس اتقارىلدى. اتاپ ايتقاندا, ەكى ايعا جەتەتىن قور جاساقتالىپ, ەڭ قاجەتتى دەگەن ءدارى-دارمەكتىڭ ءتىزىمى ۇلعايتىلدى. ونى سىرتتان اكەلۋ جانە تىركەۋ ءتارتىبى جەڭىلدەتىلدى. بىراق وڭىرلەردە ءدارى-دارمەكتەردى تۇراقتاندىرۋ قورلارىنىڭ كولەمى جانە دايىندىق جۇمىستارى بىركەلكى ەمەس. مىسالى, باتىس قازاقستان جانە اقتوبە وبلىستارىندا – ەكى ءجۇز ميلليون تەڭگەدەن. ماڭعىستاۋ وبلىسىندا – ءۇش ءجۇز ميلليون تەڭگە.
ال نۇر-سۇلتان قالاسىندا ءبىر ميلليارد التى ءجۇز ميلليون تەڭگە, الماتىدا – بەس ميلليارد تەڭگە.
دەنساۋلىق ساقتاۋ مينيسترلىگىنىڭ وڭىرلەردەگى دايىندىق بارىسىنا بەرگەن باعاسىمەن تانىستىق. سوعان سايكەس, ماڭعىستاۋ جانە الماتى وبلىستارىندا ەمحانالار مەن اۋرۋحانالاردىڭ دايىندىعى ناشار ەكەندىگى انىقتالىپ وتىر. وسى ولقىلىقتاردى ۇكىمەت پەن اكىمدەر دەرەۋ تۇزەتۋگە مىندەتتى.
ۇكىمەتكە اكىمدەرمەن بىرلەسىپ, ەكى اپتا ىشىندە تۇراقتاندىرۋ قورلارىن بەلگىلەنگەن نورماتيۆكە سايكەس جاساقتاۋدى جانە مەديتسينا ينفراقۇرىلىمىنىڭ تولىق دايىن بولۋىن قامتاماسىز ەتۋدى تاپسىرامىن.
ءۇشىنشى ماسەلە. مونيتورينگ جۇرگىزەتىن توپتاردىڭ بەلسەندىلىگى تومەندەپ بارادى. الەۋمەتتىك جەلىلەر ارقىلى ءتۇرلى جيىن-تويلاردا تۇسىرىلگەن فوتوسۋرەتتەر تارالۋدا. مونيتورينگ جۇرگىزەتىن توپتار تەكسەرىستەرىن ازايتتى. بۇل رەتتە, كارانتين شارالارى ساقتالماي, زاڭ بۇزۋ دەرەكتەرى كوبەيىپ كەتتى.
اكىمدەرگە مونيتورينگ جۇرگىزەتىن توپتاردىڭ جۇمىسىن جانداندىرۋدى تاپسىرامىن. ۆەدومستۆوارالىق كوميسسيا وسىنى قاتاڭ باقىلاۋعا الۋعا ءتيىس.
ءتورتىنشى ماسەلە. بىرقاتار تاپسىرمانى ورىنداۋدا شيكىلىك بار. «سك-فارماتسيا» مەن مەديتسينالىق ساقتاندىرۋ قورىنا قىلمىستىق تەرگەۋ جۇرگىزۋ اسەرىنەن دەنساۋلىق ساقتاۋ سالاسىن تسيفرلاندىرۋ پروتسەسى ءىس جۇزىندە توقتاپ قالدى.
بەسىنشى ماسەلە. پاندەميانىڭ ەكىنشى تولقىنى اياسىندا نەگىزگى سالماق قايتادان دارىگەرلەر تۇسەدى. ءبىزدىڭ نەگىزگى رەسۋرسىمىز – دارىگەرلەر. مەديتسينا قىزمەتكەرلەرىن قولداۋ قاجەتتىلىگىنە ەشكىم كۇمان كەلتىرمەيدى. مەنىڭ تاپسىرمام بويىنشا ەكىنشى جارتىجىلدىقتا دارىگەرلەرگە ۇستەماقى تولەۋگە قوسىمشا 150 ميلليارد تەڭگەدەن استام قارجى ءبولىندى. الايدا, ۇستەماقى مەن ساقتاندىرۋ تولەمدەرىن الۋ كەزىندە كەزدەسەتىن بيۋروكراتيالىق كەدەرگىلەر ءالى دە بار.
التىنشى ماسەلە. ۇكىمەت مەديتسينالىق كومەكتىڭ وزگە تۇرلەرىن دە كورسەتۋدى ۇمىتپاۋعا ءتيىس. انا مەن بالا دەنساۋلىعىن قورعاۋ – نەگىزگى باسىمدىقتىڭ ءبىرى. وكىنىشكە قاراي, انا ءولىمى كورسەتكىشى بارلىق وڭىردە بىرنەشە ەسە كوبەيىپ كەتتى.