قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى بارلىق قازاقستاندىق كوللەدجدىڭ ءبىلىم بەرۋ قىزمەتىنە مونيتورينگ جۇرگىزىپ جاتىر. تالداۋ ناتيجەلەرى بويىنشا 145 ءبىلىم بەرۋ ۇيىمى 330 ماماندىق بويىنشا ليتسەنزياعا قوسىمشالارىن ءوز ەركىمەن قايتارىپ بەردى (بەلگىلى ءبىر ماماندىقتار بويىنشا وقىتۋعا رۇقسات بەرەتىن قۇجات), دەپ حابارلايدى Egemen.kz
قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا ستۋدەنتتەرگە كورسەتىلەتىن قىزمەتتەردىڭ ساپاسىن جاقسارتۋعا باعىتتالعان جۇمىس تەحنيكالىق جانە كاسىپتىك ءبىلىم بەرۋ ۇيىمدارىنىڭ ديرەكتورلارىمەن بىرلەسە جۇرگىزىلگەنىن اتاپ ءوتتى.
"دەپارتامەنتتەرىمىز كوللەدجدەردىڭ ءبىلىم بەرۋ قىزمەتىنە مونيتورينگ جۇرگىزىپ جاتىر. ءبىرىنشى كەزەكتە ءبىز وقۋ پروتسەسىنە قاجەتتى قۇرال-جابدىقتاردىڭ, ادەبيەتتەردىڭ, ءبىلىم بەرەتىن ءتيىستى وقىتۋشىلاردىڭ بولۋىنا, وقۋعا بارلىق جاعدايدىڭ جاسالۋىنا نازار اۋدارامىز. وسى جۇمىستىڭ ناتيجەسىندە كوللەدجدەر قازىرگى ۋاقىتتا وزدەرىنىڭ ءبىلىم بەرۋ پروفيلىنە جاتپايتىن نەمەسە بىلىكتىلىك تالاپتارىن ساقتاي المايتىن جەكەلەگەن ماماندىقتار بويىنشا ليتسەنزيانىڭ قوسىمشالارىن قايتارۋ تۋرالى شەشىم قابىلدادى. اراسىندا ەڭبەك نارىعىندا سۇرانىسقا يە ەمەس ماماندىقتار دا بار. كەيبىر كوللەدجدەرگە بەلگىلى ءبىر ماماندىقتار بويىنشا ستۋدەنتتەر وقۋعا مۇلدەم تۇسپەگەن. مىسالى, پەداگوگيكالىق كوللەدج مەنەدجەرلەردى دايارلاۋعا تالپىنسا, ال ەكونوميكالىق باعىتتا ءبىلىم بەرەتىن كوللەدج پەداگوگتەردى وقىتپاق بولعان. سونداي-اق كەيبىر وقۋ ورىندارى ماتەريالدىق بازاسى ساي كەلمەسە دە بەلگىلى ءبىر ماماندىق بويىنشا كادرلاردى دايىنداعىسى كەلگەن. قازىرگى ۋاقىتتا ستۋدەنتتەر وقۋىن اياقتادى, ول ءۇشىن كوللەدجدەرگە مۇمكىندىك بەرىلدى. بۇدان بىلاي 145 تەحنيكالىق جانە كاسىپتىك ءبىلىم بەرۋ ۇيىمى ءۇش جۇزدەن استام ماماندىق بويىنشا ستۋدەنتتەردى وقىتپايتىن بولدى. سوندىقتان اتا-انالار مەن وقۋشىلارعا الاڭداۋدىڭ قاجەتى جوق. ەشقانداي پروبلەما تۋىنداعان جوق", دەدى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.